Turqia është provokuar sërish me shkeljen e hapësirës së saj ajrore. Edhe një herë tjetër avionët rusë nuk kanë ngurruar të futen në territorin turk, duke kërkuar medoemos shkas për kundërpërgjigje, që, nëse do të ndodhte ashtu si në fundin e nëntorit, do të qe tashmë fatale.
Një avion luftarak rus SU-24 hyri më 24 nëntor të vitit të shkuar në hapësirën turke, diçka e bërë pareshtur prej tyre gjatë asaj kohe, dhe pavarësisht dhjetë paralajmërimeve, nuk pranoi të dalë prej saj. F16-tat turke u detyruan ta rrëzojnë atë, çka i solli më pas Rusinë dhe Turqinë në prag të luftës.
Këtë radhë është një SU-34 rus që ka shkelur të premten, rreth mesditës, hapësirën turke, duke lënë të kuptohet se kërkohet me patjetër që Turqia të përfshihet në luftë. Ka patur një paralajmërim të vazhdueshëm në anglisht dhe në rusisht përpara se avioni ta shkelte hapësirën ajrore turke në provincën e Gaziantepit.
Ambasadori i Rusisë është thirrur në Ministrinë e Jashtme turke, dhe autoritetet vendase kanë protestuar për incidentin dhe e kanë dënuar atë.
Në deklaratën e lëshuar nga Ministria e Jashtme turke të shtunën thuhet se shkelja e hapësirës ajrore është tregues i veprimeve të papërgjegjshme të Rusisë. Në të i kërkohet Rusisë t’i shmangë veprime të tilla, ndryshe pasojat do të jenë përgjegjësi e saj.
Ashtu si në incidentin e nëntorit, reagimi rus ka qenë tërësisht mohues. Zëdhënësi i Ministrisë së Brendshme ruse ka deklaruar se, “Nuk ka shkelje të hapësirës ajrore turke nga avionët luftarakë të grupit ajror rus në Republikën Arabe Siriane. Deklarimet e autoriteteve turke për një shkelje të pretenduar të hapësirës ajrore turke nga një avion rus SU-34 janë propagandë e pastër.”
“Ne e shohim këtë si një rezultat të përpjekjeve të Rusisë për ta përshkallëzuar krizën në rajon,” ka thënë Rexhep Tajjip Erdogan ditën e djeshme.
Pasi presidenti turk ka shpjeguar se ka kërkuar të komunikojë me homologun rus e se kjo nuk ka qenë e mundur, është shprehur qartësisht, pa lënë vend për dykuptimësi: “Nëse Rusia vijon ta cenojë sovranitetin e Turqisë, ka për t’u përballur me pasojat.”
“Eshtë e qartë se operacionet e Rusisë në rajon nuk kanë të bëjnë me përpjekjet kundër terrorit, por janë të planifikuara vetëm për ta mbajtur në pushtet regjimin e Esadit,” ka shtuar presidenti teksa ka folur për bombardimet ruse në Siri.
I menjëhershëm ka qenë dhe reagimi i NATO-s, që po e ndjek me shqetësim rrjedhën e ngjarjeve. Shefi i NATO-s, Jens Stoltenberg, i ka kërkuar Rusisë ta respektojë hapësirën ajrore të aleancës ushtarake.
“I bëj thirrje Rusisë të veprojë në mënyrë të përgjegjshme dhe të respektojë plotësisht hapësirën ajrore të NATO-s. Rusia duhet të marrë të gjithë masat e nevojshme që të sigurojë se shkelje të tilla nuk do të ngjasin më,” kanë qenë fjalët e Stoltenberg-ut në një deklaratë.
Ai ka kujtuar se, “Incidentet e mëparshme kanë treguar se sa e rrezikshme është një sjellje e tillë.” “NATO-ja … mbështet integritetin territorial të aleatit tonë, Turqisë,” ka thënë pa mëdyshje Jens Stoltenberg.
Të ndarë në qasjen e tyre ndaj zhvillimeve në Siri, Rusia dhe Turqia gjenden prej 24 nëntorit në një përplasje të hapur. Me gjithë përpjekjet e Turqisë për t’i ulur tonet e për t’i zbutur tensionet, Rusia është përgjigjur negativisht. Gjendja e nderë është reflektuar dhe në veprimtarinë ekonomike mes dy vendeve, ndërsa Rusia ka bllokuar e ndaluar në një masë të madhe gjithçka që lidhet me Turqinë, posaçërisht në sektorin e turizmit, të ndërtimtarisë, e të importit dhe eksportit. Incidenti i së premtes është një shenjë e keqe për të gjithë ata që besonin se marrëdhëniet po përmirësoheshin dalëngadalë. /tesheshi.com/
