Qendra për Studime Euro-Atlantike në Beogradshpreson që përkundër festave të Krishtëlindjes dhe Vitit të Ri nga njëra anë, dhe zhvillimeve komplekse në Lindjen e Mesme nga ana tjetër, Perëndimi duhet t’i kushtojë vëmendjen e duhur tensioneve në rritje në marrëdhëniet Serbi-Mal i Zi.
Kujtojmë se tensionet janë shkaktuar nga miratimi i Ligjit për Fenë, i cili do të hyjë në fuqi në Mal të Zi brenda dy ditësh.
“Tensionet kanë ekspozuar dobësi të tjera në pozicionin e serbëve në Mal të Zi, gjë që nuk diskutohet në mënyrë të duhur. Si një grup studimi që thekson në radhë të parë pranimin e parimit të përparësisë së individit mbi të drejtat kolektive, duke respektuar ato të drejta që individët mund t’i ushtrojnë vetëm përmes veprimit të përbashkët, ne besojmë se ligji i përmendur është problematik dhe se metoda e adoptimit nuk është zbatuar në mirëbesim. Sigurisht, kjo vlen edhe për ngacmimin e papranueshëm të të ashtuquajturës opozitë demokratike në parlamentin malazez”, tha Qendra për Studime Euro-Atlantike me qendër në Beograd, duke u pozicionuar kështu në krah të Beogradit.
Sipas mendimit të tyre, “ligji i diskutueshëm” po miratohet në një kontekst mjaft të ndërlikuar rajonal dhe global, pasi që, në një sistem të ndërlikuar dhe të decentralizuar marrëdhëniesh midis kishave ortodokse, Kisha Ortodokse e Ukrainës së fundmi fitoi pavarësinë nga Kisha Ortodokse Ruse me një vendim të Patriarkanës së Stambollit, e cila sigurisht mund të ketë pasoja dhe mbi rezultatin e një marrëveshje eventuale midis Beogradit dhe Prishtinës.
“Duhet të kihet parasysh se një nga elementët e mëdhenj të një marrëveshje shumëdimensionale të kompromisit të mundshëm do të jetë pozicioni i Kishës Ortodokse Serbe, e cila i jep legjitimitet zyrtar Beogradit që të ketë një pozicion të qartë publik për ngjarjet në Mal të Zi, si dhe për pozicionin e serbëve diku tjetër në rajon”, thuhet nga Qendra. /tesheshi.com/
