Ministria e Mbrojtjes së Turqisë ka njoftuar se me kërkesë të NATO-s, në dy ditët e ardhshme do të dërgojë forca speciale në Kosovë, të cilat do të vendosen në kazermën në Prizren dhe u bëri thirrje palëve kundërshtare të ushtrojnë përmbajtje.
Në përgjigje të një kërkese të ardhur nga Shtabi i Përbashkët i NATO-s në Napoli, për shkak të ngjarjeve në veri të Kosovës, “është planifikuar dërgimi i forcave turke në kazermën ‘Sulltan Murat’ në Kosovë më 4 dhe 5 qershor”, thuhet në njoftim.
Siç është specifikuar, ata janë pjesëtarë të batalionit komando nga brigada e 65-të e mekanizuar e këmbësorisë nga Kirklareli, e cila më parë ishte caktuar në KFOR.
700 ushtarë shtesë të NATO-s
Deklarata shtoi se Turqia vazhdon të kontribuojë për paqen dhe stabilitetin rajonal dhe global brenda misioneve të OKB-së, NATO-s, BE-së dhe OSBE-së.
“Në këtë kontekst, vendi ynë po ndjek nga afër ngjarjet në Ballkan, ku kemi vlera të përbashkëta historike dhe kulturore, mban qëndrim konstruktiv dhe bën thirrje për përmbajtje nga palët, si dhe për zgjidhjen e ngjarjeve të fundit në pjesën veriore miqësore dhe vëllazërore të Kosovës, të cilat dëmtojnë sigurinë dhe stabilitetin rajonal, përmes dialogut”, thuhet në njoftimin e Ministrisë së Mbrojtjes së Turqisë.
Sekretari i Përgjithshëm i NATO-s Jens Stoltenberg tha më 30 maj në Oslo se aleanca ushtarake do të dërgojë 700 ushtarë shtesë në Kosovë për të shtypur dhunën që shpërtheu në veri dhe për të përgatitur një batalion tjetër për të dërguar nëse është e nevojshme. /tesheshi.com/
