Nuk kanë kaluar as tre ditë nga ikja e Presidentit Bujar Nishani nga Lugina e Preshevës dhe atje ka pasur një turbolencë dhe përplasje të madhe politike.
Është shkarkuar kryetari i komunës së Preshevës, Shqipërim Arifi, me anë të një veprimi politik të dyshimtë që duket se ka risjellë dhe rifutur në skenë politikën e vjetër të shqiptarëve në Luginë dhe akuzat e ndërsjellta.
Përmbysja e aleancës mes AND të Shqipërim Arifit dhe PVD-së së Riza Halimit polli një manovër tjetër, ku një grup këshilltarësh të PDSH-së së Ragmi Mustafës, ikën nga partia e tyre dhe u bashkuan me Riza Halimin.
Këta shkarkuan kryetarin Arifi dhe zgjodhën në këtë post kreun e Kuvendit komunal, Ardita Sinanin.
Për të kuptuar më mirë këto zhvillime pyetëm gazetarin dhe publiçisitin, Fehmi Ramadani, i cili është edhe aktivist i shoqërisë civile nga Lugina e Preshevës, por që punon e jeton prej vitesh në Prishtinë.
Ramadani e njeh mirë situatën në Luginë edhe është komentator i rregullt i zhvillimeve atje.
Duke folur për tesheshi.com, ai thotë se “e gjithë kjo situatë erdhi si pasojë e mosshkëlqimit si duhet të forcës së re politike që ngjalli shpresë, pra Alternativa për Ndryshim e Shqipërim Arfit. Ajo premtoi transparencë në punët e komunës dhe të tillë nuk pati.
“Mund të them se ndryshimi i vetëm që pati APN me partitë e tjera është vetëm mosha e re e kryetarit”.
Ramadani shton më tej se kriza ka ardhur si pasojë e “mungesës së besimit mes politikanëve që punuan jo në dritë por në hije dhe natyrisht në ndarjen e pabarabartë të interesave grupore.
“Me një fjalë, nga kthimi i shpresës, APN shumë shpejtë u adoptua në interesa të ngushta. Kursi saj se do të jetë transparente dhe e hapur dështoi. Dallimet e tyre tani më qëndrojnë vetëm në moshë dhe jo koncepte. Lugina ka figura të shquara politike por nuk po munden të dalin në skenë. Ndoshta në një të ardhme të afërt do të kemi një elitë më të avancuar politike se këto të tanishme”.
Ndërkaq, Ramadani e vlerëson pozitive vizitën e Presidentit të Shqipërisë Bujar Nishani në Luginë, pasi sipas tij është sinjal që njerëzit i mban karikuar se nuk janë braktisur nga shteti amë.
Kur e pyet se cilat të drejta duket se kanë avancuar, Ramadani mendohet pak dhe më pas mendueshëm thotë: “po Abetarja e Tiranës, diplomat, por duhet punuar më shumë”.
Kush të punojë? Një pjesë në Preshevë ka nisur protestën dhe ndoshta do të isntalojë edhe aty një çadër. Hallakatje dhe gjurulldi e madhe ndër shqiptarë…/tesheshi.com/
