Në mënyrë të rrugeshme, brenda 48 orësh dolën tre variante dhe tre histori me arrestime politikanësh shumë të lartë. Bëhet fjalë për dy presidentë (një “ish”), njëkohësisht edhe dy ish-kryeministra njëkohësisht: për Sali Berishën dhe Ilir Metën.
Të tre këto variante i kanë ricikluar në vend qarqe afër opozitës, posaçërisht pranë ish-kryeministrit Berisha.
Pikërisht kur Fredoom House publikoi raportin që e cilësonte Presidentin Meta si figurë që ka perceptimin si politikan i korruptuar, mediat pranë PD-së publikuan një letër që Adriatik Llalla ia kishte dërguar Departamentit të Shtetit të SHBA që prej një viti, kundër ambasadorit Donald Lu, të cilin e akuzoi se i ka kërkuar arrestimin e Ilir Metës.
Një lajm i vjetër që është publikuar disa herë.
Por pas përgënjeshtrimit të ambasadorit Lu dhe takimit të tij me Ilir Metën në Presidencë, gjërat precipituan.
Ish-kryeministri Sali Berisha, në një intervistë televizive akuzoi Romana Vlahutin se i ka kërkuar arrestimin e tij.
Kurse Arjan Çani shkoi edhe më tej, tek një skenar alla 007, kur tha se “Tik Llalla ka inçizuar dy ambasadorët që i kanë kërkuar arrestimin e Metës dhe Berishës”.
Berisha në intervistën e tij paralajmëroi se Edi Rama do të ketë ditë shumë të vështira.
Ndërkaq, gazetarë pranë ish-kryeministrit hedhin dyshimin se nëpërmjet Ilir Metës dhe Donald Lu-së ka një marrëveshje.
“I nderuar zoti President! Ne kulmin e konfliktit Llalla-Lu jeni shprehur ne biseda konfidenciale: “E respektoj Presidentin Nishani si njeri dhe politikan jashte mase. Por ne rastin e sulmit te Ambasadorit amerikan ndaj Kryeprokurorit Llalla duhet te marre ne mbrojtje institucionin e Kryeprokurorit. Duhet ta therrase Ambasadorin Lu dhe ti kerkoje te terhiqet nga sulmet ndaj Kryeprokurorit, se perndryshe do ta nxjerre “non grata”. Tani ke rastin me flagrant te tregosh “burrerine” institucionale, duke i kerkuar Ambasadorit Lu te te kerkoje ty falje per kerkesen qe i ka berre Llalles te te arrestoje, ose perndryshe ki kurajon ta nxjerresh “non grata”. Nese je i paster, vepro. Nje Ambasador nuk mund te jete edhe prokuror edhe hetues ne vendin ku eshte i akredituar, qofte ky edhe amerikan. Ose na thuaj se ska asnje fije shtet dhe largohu… “, shkruan Basir Çollaku.
Pra ka një alarmizëm të madh ngaqë po i kërkohet Presidentit të largojë ambasadorin Donald Lu, i cili ka marrë OK në Departamentin e Shtetit për të zgjatur mandatin e tij edhe për një vit.
“Fabula” e arrestimeve duket më shumë si një instrument politik sesa një realitet.
Kjo pasi edhe procedurialisht një person duhet të hetohet njëherë e më pas të arrestohet, jo më dy presidentë e kryeministra që kanë edhe influencë të madhe politike.
Megjithatë, duket se ka një lëvizje tektonike brenda politikës shqiptare këto ditë. Sidomos pas botimit të raportit të Freedom House.
Duket që diçka po gatuhet përpara vizitës së Hahn dhe Mogherinit javën tjetër në Tiranë.
“Peshk i Madh” përflitet, siç e shpalli edhe Donald Lu në intervistën me Blendi Fevziun. Lu përmendi Klemend Balili, njeriun misterioz që thonë që fsheh shumë sekrete të politikës shqiptare… /tesheshi.com/
