Nga Bashkim Kastrati
Në vitet e fundit është diskutuar në lidhje me cilësinë e mishit në Kosovë. Dyshimet ishin ngritur për mishin jo-cilësor për shkak se ka pasur raportime se mishi i gjedheve të ngordhura apo të sëmura është duke u shitur. Por skandali i madh shpërtheu ditë më parë kur u raportua se një kompani nga Belgjika ka eksportuar tonelata mish me afat të skaduar. Fatkeqësisht, gjithë këto tonelata me mish janë shitur, përkatësisht janë konsumuar nga qytetarët e Kosovës.
Plasja e skandalit të këtij mishi me afat të prishur është një përgjigje për çmimet e lira të mishit në marketet e mëdha të Kosovës. Shpesh ka pasur oferta për koston e suxhukut deri në 99 centë, ose kilogrami i mishit nga dy deri në katër euro, ndërkohë që në dyqanet ku përpunohet mishi e që thuhet se është i freskët, kilogrami kushton mesatarisht 7 euro.
Raportimet për skandalin e mishit kanë ndezur alarmin tek institucionet përgjegjëse të Kosovës. E para që reagoi ishte prokuroria e Prizrenit. Me iniciativën e kryeprokurorit të atyshëm dhe me vendimin e gjykatës janë bërë inspektime në disa markete dhe fabrika ku përpunohet mishi.
Gjatë këtij aksioni inspektues është gjetur një sasi e madhe e mishit me afat të skaduar e cila është konfiskuar, ndërsa në fabrikat ku përpunohej mishi janë evidentuar mangësi të mëdha sa i përket kushteve higjienike. Aty janë gjetur deri dhe minj të ngordhur. Gjithashtu janë gjetur edhe materiale tjera që janë brejtur nga minjtë. Nga aty ai mish ka përfunduar në treg.
Aksione të tilla janë ndërmarrë edhe në Komunën e Ferizajt ku është gjetur një sasi e konsiderueshme e mishit me afat të skaduar e cila është konfiskuar dhe asgjësuar.
Për të gjithë personat përgjegjës në vendet ku është gjetur mish i skaduar kanë nisur hetimet nga policia e Kosovës dhe ata pritet të dalin para drejtësisë.
Skandali i importit të mishit me etiketa të falsifikuara në Kosovës ka gjetur vend edhe në mediat evropiane. Ishin autoritetet kosovare të cilat kishin njoftuar kolegët belgë për mundësinë e mashtrimit që në shtator të vitit 2016, por belgët nisën hetimet vetëm 18 muaj më pas.
Ishte 19 shtatorit i vitit 2016 kur një kamion me mish nga “Veviba” në Bastogne mbërriti në Kosovë, në të cilin shumica e etiketave ishin grisur nga paketimi, por mbetjet treguan se mishi tashmë datonte nga viti 2004.
Përmes një njoftimi për media, FASFC ka bërë të ditur se ka kontrolluar 200 nga 2000 paleta me mish të kompanisë “Veviba”. Nga këto 200 paleta me mish, përfundimi ka qenë se rreth 70 për qind e mishit të kontrolluar është i dëmshëm.
Agjencia Federale për Sigurimin e Rrjetit Ushqimor (FASFC) në Belgjikë, ka njoftuar se ka kontrolluar të gjitha lokalet e kësaj kompanie në Belgjikë.
Hetuesit kanë gjetur se në disa raste mishi ka qenë me afat të skaduar, dhe se produktit të mishit të ngrirë i janë zëvendësuar etiketat duke ia shtyrë datën e skadimit të afateve për 1 vit më shumë.
Skandali i mishit të prishur të importuar në Kosovë nga Belgjika, ka marrë përmasa edhe më të mëdha pasi që Parlamenti i këtij shteti ka kërkuar një raport në detaje nga Agjencia Federale për Sigurimin e Rrjetit Ushqimor të Belgjikës (FASFC) lidhur me veprimtaritë e fundit të kompanisë “Veviba” nga Belgjika, e cila eksportoi mishin 12 vjet të vjetër për në Kosovë.
“Parlamenti ka pranuar një raport nga Agjencia Federale për Sigurimin e Rrjetit Ushqimor të Belgjikës, lidhur me veprimtarinë e thertores “Veviba” gjatë kohëve të fundit, dhe kjo ka ndodhur me qëllim të reformimit të procedurave kontrolluese në këtë Agjenci” thuhet në njoftimin nga kabineti i Ministrisë së Bujqësisë dhe Blegtorisë së Belgjikës. /tesheshi.com/
