Ermal Kuqo, që u tërhoq nga basketbolli i luajtur para pak ditëve, veç asaj që dha në fushë për shumë skuadra turke, veçanërisht për Efes Pilsenin e për kombëtaren e Turqisë, do të mbahet mend për një diçka tjetër shumë më specifike.
Anadollu Efes, siç njihet tashmë Efes Pilseni i dikurshëm, skuadra e njohur turke e basketbollit, vendos në vitin 2013 të bëjë një reklamë me lojtarët e tij.
Dhe për këtë nuk zgjedh të ndjekë rrugën tradicionale të bërjes së një reklame, por atë të një kamere të fshehtë.
Për këtë sipërmarrje të veçantë shfrytëzohen 15 kamera të fshehta, 540 figurantë, ndërsa 750 njerëz në tërësi shërbejnë për ta çuar misionin në fund.
Lojtarët e Anadollu Efesit, mes të cilëve shquhet qartazi Ermal Kuqo, ftohen për të ndjekur një koncert simfonik. Pasi orkestra luan një pjesë simfonike, vijon me variantin instrumental të një kënge të njohur, “Senden daha güzel”, apo “Më të bukur nga ty”.
Këtu fillon loja, pasi në sallën e tejmbushur, një person ngrihet e nis ta këndojë këngën. Basketbollistët e Anadollu Efesit shtangin, duke kujtuar se bëhet fjalë për një veprim prej të marri. Ashtu siç bën fillimisht dhe Kuqo. Më tutje gjithçka kuptohet, kur e gjithë salla ngrihet e drejtohet nga basketbollistët.
Reklama do të cilësohej si më e arrira dhe më e pëlqyera e tërë vitit 2013. Ermal Kuqo do të ishte pjesë e saj, si dëshmi e një karriere të shkëlqyer në një vend ku basketbolli është në rritje, e për të cilën kontribuoi dhe ai. /tesheshi.com/
