Julen Lopetegui, trajneri i përfaqësueses spanjolle, ka dalë në konferencë për shtyp së bashku me dy prej lojtarëve të tij, Thiago Alcantara-n dhe De Gea-n, përkatësisht mesfushorin e Bajernit të Mynihut dhe portierin e Mançester Junajtedit.
Njeriu që pasoi Vicente del Bosque-n në detyrë e ka bërë të qartë se objektivi i vetëm është fitorja ndaj Shqipërisë e marrja e kryesimit të grupit G.
“Do të bëjmë çdo gjë për të qenë kryesues të grupit. Nesër do të zbresim në fushë për ta fituar ndeshjen,” u ka thënë gazetarëve Lopetegui.
Ai nuk ka pranuar që mbi të e mbi skuadrën të ketë presion pas barazimit ndaj Italisë tre ditë më parë: “Nuk kemi presion pas barazimit përballë Italisë.”
Çështja e fushës ka qenë një tjetër temë e diskutuar, pasi është tepër e ndjeshme për spanjollët, të cilët luajnë një futboll shumë teknik.
“Fusha është ajo që është. Nuk kërkojmë më shumë,” është shprehur drejtuesi teknik i Spanjës.
E përditshmja sportive Marca e paraqiste me nota pozitive sot gjendjen e terrenit të stadiumit në Shkodër, duke shpresuar megjithatë që shirat e së dielës ta bëjnë atë edhe më të përshtatshëm për takimin.
E sa për përfaqësuesen e Shqipërisë, Lopetegui e ka çmuar fort atë.
“Nuk kemi frikë nga Shqipëria, por e respektojmë si skuadër. Janë rritur shumë gjatë viteve të fundit, dhe këtë e treguan dhe në Europian.”
Shqipëri – Spanjë do të luhet mbrëmjen e së dielës, në 20:45, në “Loro Boriçi”. Përfaqësuesja e Shqipërisë e kryeson me gjashtë pikë grupin G, por një humbje ndaj Spanjës, e bashkëshoqëruar me një fitore të thellë të Izraelit ndaj Lihtenshtajnit, e po ashtu të Italisë ndaj Maqedonisë, mund ta zbresin atë në vend të katërt. /tesheshi.com/
