Julen Lopetegui, i emëruar në vend të Vicente del Bosque-s në detyrën e trajnerit të përfaqësueses së Spanjës, nuk ka humbur kohë për t’i bërë të qarta idetë e tij.
Me një të shkuar në fushën e trajnimit me përfaqësueset spanjolle të moshave, e me skuadrën portugeze të Portos, Lopetegui ka paralajmëruar se kombëtarja e vendit të tij duhet të jetë krenare për arritjet, por nuk duhet të jetojë me të shkuarën.
“Futbolli nuk ndalon, nuk jeton me të shkuarën. Ne jemi shumë krenarë për të shkuarën, por vështrojmë në të tashmen dhe në të ardhmen,” ka bërë të ditur tekniku 49-vjeçar.
Në të parën konferencën shtypi si trajneri i ri i Spanjës, ai nuk ka lënë pa përmendur paraardhësin e tij, për të cilin ka shprehur fjalë falënderuese, “Do të përpiqemi të përfitojmë nga të gjitha gjërat e mira që ai [Del Bosque] ka bërë për shumë vite për futbollin spanjoll.”
Duke iu kthyer eksperiencës në futbollin portugez, në drejtimin e Portos, Lopetegui do të thoshte, “Mendoj se përvoja te Portoja më ka mësuar shumë, prandaj shpresoj që të më ndihmojë të marr vendime më të mira.”
Për të vijuar besimplotë për punën që e pret: “Futbolli spanjoll ka patur një brez të mrekullueshëm lojtarësh, e kjo vazhdon sot. Ne kemi për t’i frymëzuar sërish njerëzit, e do ta bëjmë futbollin spanjoll krenarinë e botës.”
I emëruari i ri në postin e trajnerit të Spanjës do të ketë detyrën e vështirë të përtëritjes së stimujve ndërsa përfaqësuesja vjen pas një periudhe të jashtëzakonshme suksesesh në nivel europian e botëror, të pasuar nga një përgjumje e thellë, e reflektuar në eliminimet e njëpasnjëshme në dy veprimtaritë më të mëdha futbollistike.
Spanja është kundërshtare e Shqipërisë në eliminatoret për botërorin e Rusisë. /tesheshi.com/
