Napoli u mposht mbrëmë nga Juventusi, e gjashta humbje radhazi për të në Torino në takimet e Serisë A. Në fitoren 2-1 të Juventusit, njëri prej golave u shënua nga Higuain, në të parën përballje me ish-skuadrën e tij.
Maurizio Sarri dhe Gonzalo Higuain u panë të përqafoheshin ngrohtësisht para takimit. Tekniku i Napolit, veç kësaj, do të thoshte pas ndeshjes, “Ai është një fenomen. Një top në këmbët e Gonzalo-s nënkupton vdekje të sigurt për mbrojtësit. Nëse Gonzalo fiton diçka në Europë, do të jem i lumtur për të.”
Në lidhje me ndeshjen, Sarri i deklaroi Sky Sport Italia-s, “Në aspektin kolektiv, Napoli punoi mirë. Por keqardhja është se gabimet tona dhuruan golat.”
Allegri, tekniku i Juventusit, do ta cilësonte një rezultat të rëndësishëm fitoren, por jo vendimtar në garën për titull në kampionatin italian.
E sa për Higuain-in, Allegri u shpreh, “Gonzalo ka cilësi të jashtëzakonshme, dhe, mbi të gjitha, punon fort për ekipin. Ai ishte shumë i lumtur; kjo ishte natyrisht një ndeshje e veçantë për të. Ai bëri zgjedhjen për të ardhur këtu, dhe absolutisht nuk duhet të ndjehet si një tradhtar. Përndryshe, ai mori një vendim kurajoz.” /tesheshi.com/
