Pas Polonisë dhe Uellsit, Portugalia u bë mbrëmë e treta përfaqësuese që kualifikohet për në çerekfinalet e Europianit.
Në një ndeshje, ku ndryshe pritshmërive, nuk kishte krijueshmëri, nuk kishte gjuajtje në portë, e për më tepër, munguan thuajse fare momentet emocionuese, përjashtuar minutat e fundit, portugezët qenë më me fat, sepse goditën në çastin e duhur.
Portugalia do të fitonte pas 120 minutave. Fitorja 1-0 ndaj Kroacisë do të vinte nga goli i Ricardo Quaresma-s, i shënuar tre minuta para se të mbyllej i gjithë takimi e ekipet të detyroheshin të gjuanin 11-metërshat.
Një ndeshje e çuditshme ka qenë ajo e mbrëmshmja, ku pavarësisht cilësisë së lartë të lojtarëve në fushë, cilësia e futbollit të luajtur ishte katastrofike.
24 minuta e 40 sekonda u deshën që të shënohej e para gjuajtje, një rekord më vete i këtij kampionati. Kroacia do të godiste 17 herë, por asnjëherë brenda kuadratit. Rekord negativ dhe për Ronaldon, që për herë të parë në një Europian nuk e godet asnjëherë portën kundërshtare në 90 minuta.
Vetëm katër minutat e fundit në shtesa do të ishin më spektakolaret. Fillimisht do të ishte Kroacia që do të rrezikonte dy herë në minutën e 116-të, e atë që nuk mundën ta bënin lojtarët e saj, e bënë portugezët.
“Nëse ka një favorit për ta fituar turneun, tani është Portugalia,” do të thoshte pas takimit trajneri i Kroacisë, Ante Cacic. Për të shtuar, “Sigurisht që jam i pikëlluar. Kishim një mundësi të madhe. Çfarë ndodhi ishte se ne nuk shënuam; ky është futbolli!”
Ndërsa trajneri i portugezëve, Fernando Santos, u shpreh mes të tjerash kësisoj: “Ishte një ndeshje shumë taktike. Nganjëherë duhet të jeni pragmatikë.” /tesheshi.com/
