Zyrtarisht prej sot, kombëtarja shqiptare do stërvitet nga një Brazilian. Sylvio Mendes Campos Júnior u prezantuar sot në ambientet e FSHF-së, duke zëvendësuar në këtë detyrë italianin Edoardo Reja, i cili ishte në krye të kuqezinjve për tre vite e gjysmë.
“Jam jashtëzakonisht i emocionuar në këto momente. Çdo rrugëtim e ka një fund por si nga ana e rezultateve, por edhe raportet njerëzore bashkëpunimi ka qenë shumë i mirë”, tha Reja në ikje.
“Rezultatet që kemi arritur nuk janë për t’u lënë mënjanë. Kemi bërë të luajnë për herë të parë rreth 40 lojtarë, kemi qenë shumë afër kualifikimit në botëror dhe për 1 pikë mund edhe të kishim kaluar në ndeshjet me eliminim direkt. Kam gjetur një skuadër që nuk kishte as krye dhe as fund. Pra kemi bërë një
punë të jashtëzakonshme”, u shpreh ai, duke pretenduar se la një sukses pas.
Nga ana tjetër, braziliani vjen pas dy eksperiencave me Lyon-in dhe Corinthias-in dhe rroga e tij do të varet nga objektivi për të shkuar në Evropianin e 2024.
Ai u shpreh se merr drejtimin e Kombëtares shqiptare për të realizuar objektivat.
“Doja t’i thoja diçka Reja-s: puna e një trajneri është gjithmonë e vështirë nuk është e thjeshtë. Ka shumë punë mbrapa skenave. Duhet të bëjmë zgjedhje, disa herë fiton, disa herë nuk fiton. E falënderoj atë për punën që ka bërë për këta futbollistë, për zemrën, për pasionin”, tha Sylvinho. /tesheshi.com/
