Oscar, mesfushori brazilian i Çelsit, pritet të lërë Anglinë për të kaluar në kontinentin aziatik, në kampionatin kinez. Transferimi është thuajse i mbaruar, dhe kalimi i Oscar-it te Shanghai SIPG për reth 60 milionë paundë do të jetë shitja më e madhe e ekipit londinez.
Çelsi shiti një tjetër lojtar brazilian në janar në futbollin kinez, Ramires-in, ndërkohë që oferta të tjera me shifra të fryra po i tundojnë lojtarët më të mirë në ligat elitare europiane. Futbolli kinez është në ekspansion; paratë e hedhura me bollëk për të sjellë në Superligën kineze lojtarë nga më të njohurit i kanë vënë ekipet europiane në vështirësi.
“Tregu kinez është një rrezik për të gjithë,” deklaroi Antonio Conte në konferencën e shtypit para ndeshjes së Çelsit me Kristëll Pallasin.
“Jo vetëm për Çelsin, por për të gjithë ekipet në botë,” u ka rënë sirenave tekniku italian.
“Ky është një treg i jashtëzakonshëm. Eshtë një mundësi e madhe për të gjithë: për trajnerët, gjithashtu, jo vetëm për lojtarët, sepse ata japin shumë para. Nganjëherë është e vështirë të përballesh me këtë situatë.”
Conte, megjithatë, ka çmuar fort kampionatin anglez, si për t’i bërë të lëkundurit të qëndrojnë në Angli.
“Unë mendoj se ne jemi në ligën më të mirë. Të arrish në Premier League është një mundësi e madhe për lojtarët dhe trajnerët , për të luftuar për titull kundër trajnerëve dhe lojtarëve fantastikë. Anglia është liga më e mirë në botë nëse keni ambicien për të provuar veten ndaj ekipeve të tjera brenda këtij realiteti. Të luash në këtë ligë është një mundësi e madhe, është një nder.” /tesheshi.com/
