E premtja ka qenë një tjetër ditë fatkeqe për refugjatët që duan të kalojnë Egjeun për t’i ikur luftës e varfërisë.
44 është numri i të mbyturve vetëm ditën e djeshme, ndërsa 20 prej tyre janë fëmijë. Dhjetëra të tjerë janë të humbur, sipas rojeve bregdetare turke e greke.
Refugjatët gjetën vdekjen pasi barkat e tyre u mbytën teksa ishin nisur nga Turqia drejt brigjeve greke. Rojet bregdetare greke thonë se kanë shpëtuar 74 të tjerë pranë brigjeve të ishujve grekë Farmakonisi dhe Kalolimnos.
Ata nxorën trupat e 17 fëmijëve, 17 femrave dhe 10 meshkujve, kurse operacionet e kërkimit vijojnë ende.
Vetëm një ditë më herët, të enjten, u mbytën 12 refugjatë të tjerë, mes të cilëve dhe fëmijë, pranë bregut turk, e 28 të tjerë u shpëtuan nga rojet bregdetare turke.
Edhe pse moti është ftohur dhe temperaturat janë ulur ndjeshëm, karvani i refugjatëve nuk ka të ndalur, e po kështu dhe tragjeditë e tyre.
Sipas Organizatës Ndërkombëtare për Migracionin, vetëm në këto ditë të janarit kanë lënë jetën në Egje 113 refugjatë, e 37.000 është numri i atyre që kanë arritur në Greqi nëpërmjet detit në të njëjtën periudhë kohore. /tesheshi.com/
