Të paktën 12,873 njerëz janë vrarë dhe 62,937 janë plagosur pas dy tërmeteve të fuqishme që goditën Turqinë jugore të hënën, njoftoi të mërkurën Administrata e Situatave të Emergjencave (AFAD).
Tërmetet me magnitudë 7.7 dhe 7.6, me qendër në provincën Kahramanmaras, prekën dhjetë provinca dhe më shumë se 13 milionë njerëz.
“Më shumë se 113,000 personel shpëtimi, mjekësor dhe personel tjetër janë vendosur në rajonet e prekura dhe më shumë se 50,000 tenda janë ngritur”, thuhet në një deklaratë të AFAD.
Përveç ekipeve të shpëtimit, në zonat e prekura janë dërguar batanije, tenda, ushqime dhe ekipe të mbështetjes psikologjike.
Sipas të dhënave të AFAD-it janë ngritur gjithsej 50 818 tenda për të mbijetuarit. Në terren janë dërguar 5434 automjete, përfshirë ekskavatorë, traktorë dhe buldozerë.
Për të përshpejtuar operacionet e kërkim-shpëtimit, Turqia shpalli të martën një gjendje të jashtëzakonshme tre-mujore në dhjetë provinca, duke përfshirë Adana, Adiyaman, Diyarbakir, Gaziantep, Hatay, Kahramanmaras, Kilis, Malatya, Osmaniye dhe Sanliurfa.
Një tërmet me magnitudë 7.7 ballë të shkallës Rihter goditi Turqinë jugore herët në mëngjesin e së hënës. Epiqendra e tërmetit është regjistruar në rrethin Pazarcik në Kahramanmaras. Provincat e Gaziantep, Sanliurfa, Diyarbakir, Adana, Adiyaman, Malatya, Osmaniye, Hatay dhe Kilis janë prekur rëndë nga tërmeti.
Pas kësaj, një tërmet i ri me magnitudë 7.6 ballë të shkallës Rihter goditi Elbistanin, gjithashtu në Kahramanmaras, të hënën në orën 13:24.
Si pasojë e tërmetit në Sirinë fqinje, të paktën 2530 persona humbën jetën dhe 4645 persona u plagosën. /tesheshi.com/
