Opinioni në Maqedoni, posaçërisht ai shqiptar, është tronditur nga ngjarja e një dite më parë në Tetovë, kur nga djegia e një banese humbën jetën nëna 39 vjeç me 4 fëmijë, nga 6 deri 14 vjeç. Tragjedia ndodhi në orët e para të mëngjesit në familjen Zulbehari.
Në rrjete sociale po qarkullon fotoja e katër fëmijëve, vëllezër e motra, dy djem e dy vajza, ikur nga kjo botë së bashku me nënën e tyre, duke lënë nën shok babanë, të zotin e shtëpisë të cilit iu shua e gjithë familja, teksa ai ndodhej në punë si roje nate.
Dhe në përpjekje për të përcjellë ngushëllime që zënë vend në një tragjedi të përmasave të tilla, ka patur deri dhe vargëzime me kumte shprese.
Hazbi Therra nga Shkupi, një vjershëtor i njohur ndër shqiptarë të Maqedonisë, i ka kushtuar një sosh, e cila i përgjigjet dhe traditës së së fortë të besimit atyre anëve.
Zemrat na u dogjën, dhe shpirtat na qanë
Lotët pa na pyet, mbi faqe na ranë
Nga lajmi që morëm, të gjithë u tronditëm
Të dashurit tanë, sa shum u mërzitëm
O zemrat e vogla, bashk me nënën tuaj
Jeni gjak i joni, nuk jemi të huaj
Jemi një familje, dhimbjen bashk e ndajmë
Gjith populli jonë, sot për juve qajmë
U dogjët për së gjalli, ju kaploi zjarri
Në kopshte Xhenneti, ju shëndroftë varri
Familje e ndershme, pranoni ngushllime
Ata që durojnë, i presin shpërblime
Se vërtet Allahu, ashtu e ka shkruar
Erdhëm n’këtë botë, gjithë për tu sprovuar
E kush duron sprovat, ngelet fitimtar
I din Zoti t’fshehtat, Ai është Bujar
Çfarë do që të themi, sido që të ndjehemi
Të Allahut jemi, te Ai do kthehemi. /tesheshi.com/
