Nga Ahmet Zani
Kjo është një ndër historitë tragjike shqiptare të këtyre 25 viteve, ku vulën ia ka vënë pashpirtësia, grykësia dhe korrupsioni i atyre që kanë fate njerëzish në dorë duke qeverisur.
Në vitin 1993, familja Tafa në Milot të Kurbinit do të humbte 5 anëtarë të saj pas rrëshqitjes së një shkëmbi që ra mbi banesën e tyre për shkak tw reshjeve. Vitet do e kishin fashitur dhe kjo tragjedi do ish harruar sikur në një fare forme mos vazhdonte edhe sot. Dhe kjo pas reshjeve të dendura dhe përmbytjeve, ku familjes Tafa i është futur uji e lluca në atë fare banese ku janë rrasur që pas tragjedisë, ish-zyra ndërrmarjeje të asaj kohe.
Niveli i ujit ka depërtuar në banesë në mbi 1 metër dhe plaka e familjes Gushe Tafa, thotë se falë Zotit kanë shpëtuar. “Menjëherë më erdhi në mendje dita kur humbëm plot pesë njerëz nga familja në vitin 1993 dhe askush nga pushtetarët nuk na mundësoi ndërtimin e banesës, por na akomoduan në disa ish- zyra ku dhe tani jemi të rrezikuar nga ujrat e tepërta ngaqë mungojnë kanalet kulluese”, thotë plaka Gushe e drobitur nga fatkeqësia që u ka rënë. Tashmë, ata më shumë se ujin në banesë, vuajnë mashtrimin që iu është bërë, grabitjen pse jo nga pushtetarët, të atyre parave me të cilat do kishin një tjetër shtëpi pas tragjedisë së shembjes së saj dhe humbjes së 5 shpirtërave.
Historia
Gushe Tafa tashmë rreth 80-tave i ka shpëtuar rrezikut nga rënia e shkëbit në vitin 1993, gjë që shkaktoj plot pesë viktima. Reshjet e mëdha shkulën shkëmbin mbi banesë e cila u rrokullis duke shembur shtëpinë dhe shkaktoj pesë viktima që ndodheshin brenda banesës, ndër ta nusja e shtëpisë me dy fëmijë 3 dhe 1 vjeç, si dhe kunati i saj me vjehrrën. Kjo ngjarje atëherë shokoi opinionin në tërë vendin. Shpejt e shpejt vendorët i strehuan tek disa zyra në Milot, por pa iu mundësuar në vite tjetër banesë për të jetuar normal, e cila për më tepër tashmë dergjen të mbuluara nga balta nga përmbytjet. Dhe ky ishte akti tjetër i tragjedisë.
“Disa vendorë seç sajuan dhe nuk na kanë dhënë asnjë fond, ndërsa jemi informuar se qeveria miratoi shpenzime për familjen tonë, por asgjë nuk përfituam. Thuhet se disa nga drejtuesit lokalë gllabëruan lekët tona, pasi asnjëri nga ne nuk i dinim hiletë e kurdisura dhe tani ku jemi katandisur. Fëmijët ishin të pashkolluar dhe burri im shumë i urtë nuk i kuptonte dot e prapaskenat e pushtetarëve, atyre që na morën fondin nga shembja e shtëpisë dhe ku humbëm dhe 5 jetë “, thotë gati në të qarë Gushe Tafa
Albani, djali 37-vjeçar i Gushes përpiqet të pastrojë nga balta shtëpinë e cila ndodhet ngjitur me rrugën nacionale që lidh veriun e vendit, por nga frika e ardhjes së reshjeve nuk mund të qasë tre fëmijët. Askushi nga pushtetarët nuk është kujtuar për brengën e madhe të familjes Tafa në Milo veç një administratori lokal, Dritan Preçi, që u ka mundësuar të strehohen tek fqinjët e që ata i janë shumë mirënjohës.
Ndërsa Albani, edhe ai nën dëshpërim, thotë se ka humbur çdo fije shprese tek pushtetarët, sidomos ata lokalë.
As ai vetë nuk e di se cila do jetë e ardhmja.
Pas shkëmbit që u morri shtëpinë dhe jetën 5 të afërmve, ata po përballen prej 22 vitesh me zemra prej guri. /tesheshi.com/
