Tragjedia ajrore e Smolenskut, ku 6 vjet më parë humbi jetën presidenti i Polonisë, Leh Kaczynski dhe i gjithë stafi i tij, bashkë me krerët e ushtrisë, është shënuar në Poloni me ndjenjën e fortë të akuzës ndaj Moskës zyrtare.
Varshava këtë radhë ka përkujtuar dy tragjedi që kanë ndodhur më 10 prill: vrasjen e 96 zyrtarëve të lartë të shtetit dhe ushtrisë që ndodhi më 2010-n, por edhe 70-vjetorin e ekzekutimit të më shumë se 20.000 të burgosurve polakë të luftës në urdhër të miqve të Kremlinit në pyjet Katyn dhe disa qytete të tjera në ish-Bashkimin Sovjetik, në vitin 1940.
Edhe sot pas 6 vitesh, vëllai i presidentitt të ndjerë konservator, Jaroslaw Kaczyński ka deklaruar se nuk ka asnjë dyshim që ish-kreu i shtetit polak u vra nga presidenti rus Vladimir Putin.
Ky është përvjetori i parë i tragjedisë, që përkujtohet në kohën kur në pushtet është partia “Ligj dhe Drejtësi” e themeluar nga vëllezërit Kaczynski, njëri ish-president dhe tjetri ish-kryeministër dhe vëllai i tij binjak, ish-kryeministri Jaroslav Kaczynski.
Para ambasadës së Rusisë, 150 mbështetës të partive konservatore në pushtet pas thirrjes së gazetës pro-qeveritare të djathtë Gazeta Polska, zhvilluan një protestë ku emërtuan kreun e Kremlinit si shkaktar të tragjedisë.
Kryeredaktor i gazetës, Tomas Sakjeviç, kërkoi që Rusia duhet të bëjë një hetim të thellë për vrasjen e presidentit polak duke kërkuar që të dënohen fajtorët e vërtetë.
Presidentit polak, Andrzej Duda, së bashku me të bijën e Lech dhe Maria Kaczynski, Martan, bënë homazhe në varrin e çiftit presidencial që u vra në tragjedinë e Smolenskut.
Ceremonia u zhvillua në Krakov në vendin ku prehen mbretërit e Polonisë.
Një tjetër marshim i madh do të zhvillohet sakaq, me në krye Jaroslav Kaczynski-n, të vëllain e Presidentit. Ata do të manifestojnë para Pallatit Presidencial në Varshavë për të kërkuar të vërtetën e Smolenskut, pasi ata nuk besojnë konkluzionet dhe hetimet ruse dhe polake që ishte një aksident dhe jo vrasje.
Moska në hetimin që zhvilloi gjashtë vjet më parë theksoi se tragjedia ndodhi si pasojë e motit të keq, dhe se aeroporti i Smolenskut ishte i papërgatitur teknologjikisht për të bërë të mundur uljen e avionëve.
Por hetimi polak ka zbuluar se procesverbalet e kontrollorëve ajrorë rusë kanë një mospërputhje të thellë, janë në kaos.
Sipas ekspertëve polakë, kontrollorët rusë duhet të mos e lejonin uljen e avionit presidencial në Smolensk, por ta devijonin në aeroportit Vitebsk në Bjellorusi.
Përgatiti: Ylli Pata – /tesheshi.com/
