Kryetari i Partisë Demokratike, Lulzim Basha thotë se rafineria e Ballshit është afera më e re korruptive e kryeministrit, Edi Rama. Gjatë një takimi me drejtues të strukturave të PD-së në Mallakastër dhe Patos, lideri i opozitës theksoi se kreu i qeverisë, bashkë me miqtë e tij ftojnë miliona euro nga nafta në muaj, ndërsa punonjësit e kësaj industrie marrin paga qesharake.
“Sa është fitimi i rafinerisë?! 30 milionë euro në muaj është xhiroja, minimalisht 10 milionë euro në muaj është fitimi, pjesëtojeni për 5 mijë naftëtarë. Sikur ky fitim ti shkonte i gjithi naftëtarëve, bëhet fjalë për 2 mijë euro për naftëtarë, domethënë 2.6 milionë lekë të vjetra për naftëtar. Por naftëtarët kanë rroga minimale dhe pasiguri për nesër. Në vend që të kemi 5 mijë naftëtarë me një rrogë, me një pagë dinjitoze, nuk po them 2 milionë e 600 mijë, por të paktën 500 apo 600 mijë lekë, kemi Beson me një grusht njerëzish që fusin në xhepat e tyre 10 milionë euro në muaj dhe i ndajnë me Edi Ramën, me Damian Gjiknurin, me Arben Ahmetajn me shokë. Ky është realiteti i Shqipërisë sot, qeveritarët e korruptuar e kanë kapur për fyti buxhetin e shtetit. Një grusht monopolistësh po vjelin pasuritë e shqiptarëve dhe nga ana tjetër mbështeten tek një grusht kriminelësh që shfrytëzojnë mijëra shqiptarë, midis tyre fëmijë dhe gra për ta mbjellur Shqipërinë me hashash”, tha Basha.
Beteja që kemi përballë, theksoi ai, është përmbysja e një klike të korruptuar dhe të inkriminuar, e cila do te beje gjithcka qe te mbroje miliardat qe ka perfituar buxheti i shteti, krimi dhe droga.
“Ne jemi sot në një vend ku qeveria ekziston vetëm për të zhvatur pasurinë e vendit, ku Kryeministri ekziston vetëm për tu pasuruar dhe për të pasur sa më shumë pushtet. Për këtë arsye buxheti i shtetit masakrohet me tendera, koncesione, privatizime, shpenzime të cilat nuk shkojnë në mirëqënien e qytetarëve. Aleanca me krimin ka bërë të mundur që Kryeministri ti gëzohet qindra miliona eurove, dollarëve, lekëve të drogës. Beteja që kemi përballë është përmbysja e një sistemi, e një klike të korruptuar dhe të inkriminuar e cila ka në lojë miliardat e buxhetit dhe miliardat e krimit, dhe do ti mbrojë ato me çdo kusht e me çdo çmim”, përfundoi ai. Pak ditë më parë, si pasojë e një shpërthimi në rafinerinë e Ballshit humbi jetën punonjësi, Shkëlqim Muça e 7 të tjerë mbetën të plagosur./tesheshi.com
