Në të gjitha xhamitë e Shqipërisë, Kosovës dhe Maqedonisë, sot u bë thirrje për mbledhjen e kontributeve për t’iu ardhur në ndihmë banorëve të lagjes Hasanbeg të Shkupit, të cilët po përballen këto ditë me një situatë në përmasat e tragjikes, si pasojë e përmbytjeve të pazakonta të ndodhura pak ditë më parë, ku dhe humbjet në njerëz nuk qenë të pakta, me afro 30 syresh të vdekur e të zhdukur, disa nga të cilët nuk janë gjendur ende.
Duke shfrytëzuar këtë të premte xhumaje, imamët e të gjitha xhamive i kanë ftuar bashkësitë përkatëse që të kontribuojnë sa munden për t’jua lehtësuar sadopak hallet atyre njerëzve, të cilët kanë humbur shumëçka, e që kanë nevoja emergjente.
Thirrja erdhi pas vendimit të të tre komuniteve zyrtare, në Shqipëri, Kosovë e Maqedoni.
Shumë imamë iu drejtuan besimtarëve duke potencuar me të madhe domsdoshmërinë e kësaj ndihme ndaj atyre banorëve, pa bërë aspak dallim se cilit nacionalitet i përkasin.
Dhe deri tani njoftohet se një shumë e madhe është bërë e mundur të mblidhet në një ndër xhamitë kryesore të Tiranës e jo vetëm, “Dine Hoxha”, e cila dallohet për mbledhjen e shpejtë të kontributeve për çdo rast fatkeqësie e nevoje për ndihmë. /tesheshi.com/
