Sipas burimeve zyrtare, mendohet se në të gjithë Anglinë gjenden 600 ndërtesa të larta të veshura me panele të ngjashme me ato të përdorura në kullën 24-katëshe Grenfell në Londër, e cila u përfshi nga zjarri në 14 qershor duke shkaktuar vdekjen e të paktën 79 personave.
Zjarri shkatërroi 151 apartamente, shumica e të cilave brenda vetës kullës, por gjithashtu edhe disa prona përreth.
Veshja me panele përdoret tipikisht për sipërfaqet e jashtme të ndërtesave të larta për të përmirësuar termoizolimin dhe për të kuruar paraqitjen e ndërtimit, por përmbajtja në këto panele e lëndëve të ndezshme dyshohet si një nga shkaqet e kësaj tragjedie.
Për të vlerësuar rrezikun potencial, po analizohen panelet e disa prej këtyre ndërtesave të larta. Deri tani, në shtatë prej tyre që gjenden në katër zona të ndryshme të Londrës janë gjendur panele të ngjashme.
Ato janë prej alumini, ndërsa mbushja e tyre e brendshme prej polietileni.
Sipas specialistëve të mbrojtjes nga zjarri, heqja dhe zëvendësimi i këtyre paneleve në të gjithë vendin do të kushtonte miliona paund. Ata thonë gjithashtu se problemet me panelet veshëse dhe karakteristikat e tyre nuk prekin vetëm banesat sociale, por janë të përhapura në një gamë të gjerë pasurish të paluajtëshme.
Dyshohet se panelet e kullës Grenfel nuk plotësonin standartet e caktuara nga autoritetet përkatëse. /tesheshi.com/
