Një ndër viktimat më të fundit në ferrin sirian, atë që po ndodh në Halep, është një i ri i cili bënte rolin e një kllouni për të ngushëlluar sadopak fëmijët e qytetit tragjik.
Enes al-Basha, 24-vjeçar ishte drejtor i një shoqate të shoqërisë civile të quajtur Space of Hope. “Ai jetoi për të bërë fëmijët të qeshur dhe të lumtur në vendin më të rrezikshëm”, ka shkruar në Facebook Mahmoud al-Basha, i cili e identifikoi veten si vëllai i viktimës.
“Enesi refuzoi të largohet nga Halepi dhe vendosi të qëndrojë atje për të vazhduar punën e tij si vullnetar, për të ndihmuar civilët dhe që të japë dhurata për fëmijët në rrugë në mënyrë që të sjellë shpresë për ta”, shkruan më tej ai.
Prindërit e viktimës, siç njoftojnë mediat e huaja, u larguan nga qyteti para se qeveria të fillojë rrethimin e pjesës lindore të Halepit në korrik. Ai u martua vetëm dy muaj më parë, ndërsa gruaja e tij mbetet e bllokuar në enklavën e zotëruar nga kryengritësit.
Ofensiva e qeverisë ka sjellë granatime dhe bombardime të papara në ditët e fundit, duke lënë qindra me qindra civilë të vdekur dhe duke bërë që më shumë se rreth 25 mijë të largohen nga shtëpitë e tyre.
Ndërkohë, rreth 250 mijë njerëz jetojnë nën rrethim, në mesin e tyre 100 mijë fëmijë. Rezervat ushqimore po pakësohen, ndërsa nuk ka mbetur ndonjë spital që të jetë në funksion.
Dhe në këtë panoramë të zymtë, dhe padyshim tragjike, vjen pra lajmi i vdekjes së një kllouni për fëmijët nën dëshpërimin e luftës, si pasojë e bmbardimeve më të fundit të forcave të Assadit të ndihmuara nga ata ruse. /tesheshi.com/
