Tragjedia e emigrantëve në Këlcyrë, Prokurori: Ishte vrasje!

Për tragjedinë me tetë të vdekur ndodhur në brigjet e Vjosës në Këlcyrë, shtatë prej tyre emigrantë, prokurori Petrit Çano e cilësoi ngjarjen si kriminale e jo aksident.

Sipas tij, shoferi, i identifikuar si Edison Bregaj, ka nxituar për të humbur gjurmët nga patrulla e policisë që hasi rrugës, edhe pse efektivët nuk ishin në ndjekje.

“Ky nuk është aksident, është një ngjarje kriminale. Personi që po i transportonte për t’i dërguar drejt vendeve të Bashkimit Europian ka hasur në një patrullë të policisë gjatë rrugës. Në këtë moment, ai është kthyer mbrapsht dhe ka ecur me një shpejtësi shumë të madhe, besoj deri në mbi 170km/h. Në një segment të rrugës, ai ka humbur kontrollin e mjetit dhe ka rënë në vendin ku më pas u gjetën viktimat. Ka qenë një mjet tip Benz me portobagazh, ishin tetë veta brenda të njëjtit mjet. Një pjesë kanë qenë të futur në portobagazh, një pjesë në sediljet e prapme. Shoferi ka qenë i ri, rreth moshës 27-28 vjeç. Nuk është aksident sepse ai i ka vrarë ata, përveç trafikimit të emigrantëve të paligjshëm, ai i vrau. Dyshohet se ka qenë pjesë e grupeve të organizuara kriminale që veprojnë në fushën e trafikimit të emigrantëve. Policia nuk ishte në ndjekje, ai thjesht donte të humbte gjurmët sepse efektivëve u humbi dhe nuk po i ndiqnin”, tha prokurori Çano në “Shqipëria Live” në TCH.

Gjithsesi, dhe vetë drejtuesi i mjetit vdiq së bashku me ngarkesën njerëzore. /tesheshi.com/