Mbushen sot 8 vite nga tragjedia e 21 Janarit 2011. Katër veta u vranë në një protestë të dhunshme para Kryeministrisë. Aleks Nika, Ziver Veizi, Hekuran Deda dhe Faik Myrtaj, ishin viktimat e asaj dite, ekzekutuar, siç u provua nga hetimet, prej plumbave të Gardës nga brenda rrethimit të selisë qeveritare.
Në një proces me shumë pikëpyetje, gjykata i cilësoi vrasjet si të ndodhura “pa dashje”, duke dënuar me një vit ish-komandantin e Gardës, Ndrea Prendi, si dhe gardistin Agim Llupo me 3 vite.
Asnjëri prej tyre sot nuk është pas hekurave dhe nga familjarët e nga një pjesë e opinionit, krimi ka mbetur i pandëshkuar. Në ato kohë, ministër i Brendshëm qe Lulzim Basha, e ai, së bashku me kryeministrin Berisha nuk janë marrë kurrë në pyetje gjatë hetimeve.
Dyshja në fjalë konsiderohen si urdhërdhënësit e vrasjeve, të dyshuar dhe si të implikuar në manipulimin e provave, sidomos me fshirjen e serverit të Kryeministrisë, faktuar nga një hetim i FBI-së.
Në këtë 8-vjetor, familjarë të viktimave janë shprehur së shpresojnë te SPAK e Byroja e Hetimit, si dy institucionet e reja në formim në kuadër të Reformës në Drejtësi, se do munden ato ta rihetojnë çështjen e ta çojnë përgjegjësit, edhe ata politikë, në bankën e të akuzuarve. /tesheshi.com/
