Tetë persona vdiqën duke u ngjitur në vullkanin Klyuchevskaya Sopka në lindjen e largët të Rusisë me erërat e ftohta që ndaluan përpjekjet e shpëtimit, shkruan agjencia ruse e lajmeve Interfax dhe raporton Reuters.
Autoritetet lokale njoftuan fillimisht se gjashtë persona kishin vdekur dhe se gjashtë të tjerë besohej se ishin bllokuar nga një grup prej 12 personash, duke përfshirë dy udhërrëfyes.
Megjithatë, më vonë autoritetet e rajonit të Kamçatkës njoftuan se dy persona të tjerë kishin vdekur dhe se ky informacion u dërgua nga një prej udhërrëfyesve që komunikon me autoritetet nga vullkani me telefon satelitor.
Era e stuhisë
Një grup prej 12 personash u nisën për t’u ngjitur në vullkanin 4,754 metra të lartë të martën, por hasën në telashe të shtunën kur disa nga grupi vdiqën në një rënie gati 4,200 metra të lartë.
Ekipet e shpëtimit u përpoqën t’i arrinin të dielën, por u detyruan të ktheheshin pasi erërat e forta penguan uljen e helikopterit të tyre.
“Ata është dashur të zbarkojnë në një lartësi prej 3300 metrash, por për shkak të erës së stuhishme prej 30 metrash në sekondë, nuk kanë mundur ta bëjnë këtë, pavarësisht dy tentativave brenda pak orësh”, thanë ekipet e shpëtimit.
Ata thanë se do të përpiqeshin të arrinin sërish grupin nesër, nëse e lejonte moti.
Trashëgimi e UNESCO-s
Klyuchevskaya Sopka është më i larti nga mbi 160 vullkanet, majat me dëborë të të cilit ngrihen mbi gadishullin rus Kamçatka. Është pjesë e Trashëgimisë Botërore të UNESCO-s për shkak të bukurisë së saj të jashtëzakonshme natyrore.
Temperaturat në mal mund të arrijnë deri në minus 14 gradë Celsius gjatë natës.
Ekipet e shpëtimit paralajmërojnë se mali, i cili përbëhet nga tufa shkëmbinjsh vullkanikë të përzier me borë dhe akull, konsiderohet veçanërisht i rrezikshëm për alpinistët për shkak të lartësisë së tij dhe rrezikut të një shpërthimi vullkanik.
Shpërthimet ndodhin çdo katër ose pesë vjet dhe shkencëtarët paralajmërojnë se aktiviteti i atij vullkani është rritur ndjeshëm vitet e fundit. /tesheshi.com/
