Duket se tragjeditë në Maqedoni kanë si kryefjalë zjarrin, më shumë viktima që përfshihen nga flakët dhe japin shpirt mes tyre.
Kështu, më shumë se 50 të rinj kanë humbur jetën dhe shumë të tjerë janë plagosur si pasojë e një zjarri të rënë në një diskotekë në Koçan.
Mediat vendase bëjnë të ditur se ngjarja ka ndodhur rreth orës 03:00 të mëngjesit të 16 marsit, në një klubin e natës “Koçani Pulse”. Në diskotekë ishin rreth 1500 të rinj, duke ndjekur një koncert të një grupi të famshëm vendas.
Raportohet se shkak i zjarrit dyshohet të ketë qenë lëndët piroteknike që janë përdorur brenda në ambientet e lokalit për të festuar.
Bëhet me dije që për shkak të viktimave të shumta, tashmë në Shkup janë anuluar të gjitha vizitat zyrtare, ndërkohë që ministri i Brendshëm Pançe Toshkovki po qëndron tashmë në Koçan dhe gjatë ditës pritet të arrijnë edhe politikanë të tjerë.
“Zjarri ka shpërthyer nga mjetet piroteknike që janë përdorur në koncert. Për një periudhë të shkurtër kanë arritur edhe ekipe mjekësore edhe nga qytetet e tjera të afërta dhe helikopteri me te cilin janë bartur të plagosurit. Kanë humbur jetën 51 viktima, më tepër se 100 janë lënduar dhe janë dërguar nëpër spitale në Shtip dhe Shkup”, tha Toshkovski.
Ndërkohë që u shpreh i prerë se përgjegjësit e kësaj tragjedie, përfshi dhe organizatorët do të përballen me organet e drejtësisë.
BREAKING: Fire breaks out at nightclub in Kocani, North Macedonia, killing at least 50 people. pic.twitter.com/zQ55FBINPA
— AZ Intel (@AZ_Intel_) March 16, 2025
“Jemi duke bashkëpunuar ngushtë me Prokurorinë Publike dhe me të gjitha organet tjera, po punojmë hap pas hapi për zbardhjen e plotë të kësaj tragjedie”, tha Toshkovski duke shtuar se të gjithë duhet të mbajnë përgjegjësi morale.
Nga ana tjetër, kryeministri Hristijan Mickoski tha se kjo është ditë e rëndë për Maqedoninë. Humbja është shumë e madhe, dhembja e familjes nuk mund të përshkruhet. “Në këto momente të pikëllimit të thellë, jemi me ata që humbën të dashurit e tyre. Populli dhe qeveria do të bëjnë gjithçka për të zbutur dhembjen dhe për të ndihmuar në këto momente të vështira. I bëj thirrje të gjitha institucioneve kompetente, shërbimeve shëndetësore, autoriteteve lokale të ndërmarrin të gjitha masat për të ndihmuar të lënduarit dhe për të dhënë mbështetjen e duhur familjeve të prekura”, thekson Mickoski.
Kujtojmë se pak vite më parë, një tragjedi e ngjashme ndodhi me një autobus me shqiptarë që kthehej nga Turqia, ku në Bullgari ndodhi të shkrumbohej në pak minuta pas një përplasjeje në bordurë. Shumica e pasagjerëve mbetën brenda dhe dhanë shpirt mes flakëve.
Po ashtu, në një spital COVID në Tetovë do shpëthente një zjarr duke shkaktuar po këto përmasa tragjedie. /tesheshi.com/
