Rreth një duzinë arkivole u lanë të varur në ajër pas shembjes së një ndërtese katërkatëshe me kamare varresh në varrezat më të vjetra në Napoli, raporton The Guardian.
Ky është incidenti i dytë këtë vit në të njëjtin vend dhe kritikët fajësojnë për problemin menaxhimin e dobët të varrezave në qytetin jugor italian. Fatmirësisht nuk ka pasur viktima.
Varrezat Poggioreale janë varrezat më të mëdha në Napoli dhe ndërkohë që hetimet për shembjen e ndërtesës së mermerit janë duke vazhduar, autoritetet kanë vendosur të mbyllin varrezat.
Ndërtesa e shembur e quajtur Ringjallja ndodhet në zonën e varrezave të Porta Balestrieri dhe në momentin e shembjes nuk kishte vizitorë në varreza sepse ishte e mbyllur.
“Shembja u parapri nga një zhurmë dhe një re e trashë pluhuri. Si administratë, ne kujdesemi për të gjitha formalitetet e nevojshme,” tha Vincenzo Santagada, këshilltari i Napolit përgjegjës për varrezat.
Një hetim i veçantë vazhdon për shkak të incidentit në janar, kur një ndërtesë u shemb në një pjesë tjetër të varrezave dhe u shkatërruan rreth 300 varre. Familjet e të ndjerëve kanë mbajtur një protestë të martën.
“Fati i vetëm është që arkivolet e familjes sime nuk ranë, sepse u varrosën më thellë brenda ndërtesës”, tha Maurizio Boddi për gazetën italiane Dire.
Gruaja, prindërit dhe prindërit e gruas së tij u varrosën në ndërtesën e shembur.
Politikanët në Campania, rajoni përreth Napolit, thonë se varrezat janë lënë pas dore prej vitesh. /tesheshi.com/
