Dy muzikantë britanikë me famë, çift bashkëshortësh, si dhe vajza e tyre 7 muajshe, u shuan kur avioni i tyre u rrëzua në Alpet Zvicerane.
Fjala është për kompozitorin Jonathan Goldstein, fitues i shumë çmimeve, gruan e tij Hannah, një saksofoniste e njohur, dhe vajzën e tyre Saskia. Familja po udhëtonte me një avion të vogël nga Zvicra për në Itali, një fluturim që u ndërpre tragjikisht në mes.
“Jemi të tronditur që kemi humbur Jonathan, Hannah dhe Saskia. Eshtë e mahnitshme se sa i kemi dashur. Ata ishin aq të lumtur së bashku dhe ne do të na mungojnë shumë”, tha një zëdhënës i familjes.
Sipas një raporti nga policia zvicerane, aeroplani u ngrit nga një aeroport në Zvicrën perëndimore, e më pak se 90 minuta pas ngritjes, u rrëzua pranë kufirit italian duke shpërthyer në flakë.
Jonathan Goldstein ishte themeluesi dhe drejtori krijues i Goldstein Music Group, një agjensi prodhuese muzikore me bazë në Londër që kishte si partnerë HBO dhe Royal Shakespeare Company. Ai kompozoi melodi të spikatura për film, teatër dhe reklama.
Hannah Goldstein ishte një saksofoniste që bashkëpunonte rregullisht me BBC dhe performonte në Royal Albert Hall dhe në sallën Royal Festival. /tesheshi.com/
