Një avion me 93 pasagjerë dhe pesë anëtarë ekuipazhi të Bek Air, u rrëzua këtë mëngjes pranë qytetit të Almaty, Kazakistan, menjëherë pas ngritjes, duke vrarë të paktën 15 njerëz.
Të mbijetuarit pretendojnë se avioni po dridhej para përplasjes dhe se u dëgjua një “zhurmë e tmerrshme”.
“Avioni ishte duke fluturuar në një vijë të pjerrët. Ishte si një film: njerëzit bërtisnin, bërtisnin dhe qanin”, tha një pasagjer i mbijetuar për Tengrineës.
Ajo shtoi se ka dëgjuar një zhurmë të tmerrshme para se avioni të fillonte të humbiste lartësinë, raportoi Reuters.
Aeroplani, një Fokker 100 që fluturonte drejt kryeqytetit Nur-Sultan humbi lartësinë e tij gjatë ngritjes dhe depërtoi nëpër një gardh betoni para agimit, duke goditur dhe një ndërtesë dykatëshe, tha Komiteti i Aviacionit Civil në Kazakistan.
Një tjetër i mbijetuar, biznesmeni Aslan Nazarali, i tha revistës Vremia se avioni filloi të dridhej pasi fitoi lartësi rreth dy minuta pas ngritjes.
“Në një moment, filluam të binim, jo vertikalisht, por në një kënd. Dukej sikur kontrolli i avionit kishte humbur”, tha ai.
Avioni filloi të humbiste lartësinë në 7.22 me kohën lokale. Të paktën 66 persona u plagosën, 50 prej tyre në spital.
Zyra e guvernatorit të Almaty tha se 93 persona ishin në aeroplan, përfshirë tetë fëmijë dhe pesë anëtarë të ekuipazhit.
Ministria e Industrisë dhe Infrastrukturës së Kazakistanit ka pezulluar përkohësisht punën e Bek Air.
Aeroporti shkroi në faqen e tij në Facebook se nuk kishte ndodhur asnjë zjarr dhe se një operacion shpëtimi kishte filluar menjëherë pas përplasjes, thanë agjensitë. /tesheshi.com/
