Fluturimi FZ981 i avionit Boeing 737-800 të kompanisë ajrore FlyDubai ka përfunduar tragjikisht në orët e para të së shtunës, duke u marrë jetën 62 personave në bord, 55 prej të cilëve ishin pasagjerë, ndërsa shtatë të tjerët i përkisnin personelit.
Avioni i nisur nga Dubai do të ulej në Rostov-na-Donu, një qytet 950 kilometra në jug të Moskës, por nuk ka arritur ta bëjë siç duhet këtë gjë. Ai është përplasur në tokë gjatë përpjekjes për ulje, duke mos lënë asnjë të gjallë prej atyre që fluturonin me të.
Raportimet flasin për një braktisje të tentativës së parë të avionit për t’u ulur, për një sjellje për dy orë në ajër, e më pastaj për përplasjen në tentativën e dytë të uljes.
Era e fortë dhe shikueshmëria e ulët për shkak të ndriçimit të pamjaftueshëm të pistës mendohet të jenë ndër faktorët që çuan në përplasjen e avionit gjatë uljes.
Autoritetet rajonale bëjnë të ditur se shumica e udhëtarëve kanë qenë rusë.
FlyDubai është një kompani ajrore relativisht e re. Ajo ka nisur të operojë që nga viti 2009, e ka qendrën në Dubai, e kryen fluturime low cost. /tesheshi.com/
