Një sasi armësh dhe municionesh, të cilat do të trafikoheshin në Greqi, u zbuluan nga policia greke në kufi me Shqipërinë.
Sipas policisë greke, të paktën 3 persona u identifikuan në një zonë pyjore, ndërsa mbanin 3 çanta.
Por, sapo panë policinë 3 shtetasit braktisën çantat dhe u larguan drejt territorit shqiptar, duke përfituar edhe nga terreni dhe errësira.
Policia gjeti në çantat e braktisura 3 kallashnikovë, 11 granata difensive, 5 pllaka tritoli, 33 detonatorë dhe 1593 fishekë, të gjitha armatime kineze.
“Kathimerini” shkruan se policia kishte marrë informacione prej disa muajsh që përmes kufirit shqiptaro-grek trafikoheshin armë.
“Ne po prisnim mundësinë e duhur për të identifikuar dhe kapur trafikantët”, thotë një oficer policie për gazetën greke.
Armët mendohet se kishin destinacion Janinën, ku tre personat mendohet se kanë bashkëpunëtorët e tyre.
“Kathimerini” shkruan se në hetime është angazhuar edhe departamenti i anti-terrorizmit në Greqi. Armët do t’i nënshtrohen testeve balistike për të vërtetuar nëse janë përdorur në ngjarje kriminale. /tesheshi.com/
