Lumi në qendër të qytetit të Çikagos tradicionalisht është ngjyrosur jeshil në Ditën e Shën Patrikut, por këtë vit vetëm një numër i vogël i njerëzve ndoqën këtë rit për shkak të pandemisë.
Në një përpjekje për t’u dhënë banorëve të Çikagos një dozë normaliteti për shkak të pandemisë, por në të njëjtën kohë duke i dekurajuar ata nga tubimet masive, kryebashkiaku Lori Lightfoot urdhëroi që lumi të rilyhet me të gjelbër, duke mos zbuluar kohën e saktë më herët.
Anija e parë me bojë lundroi në anën veriore të lumit në orën 7:10 pasdite. Anëtarët e sindikatës së hidraulikëve të qytetit hodhën bojë në lumë nga një anije e stolisur me simbolin e tyre. Ata u bashkuan me anije të tjera me flamuj amerikanë ose logo birre, disa me ngjyrën e tyre dhe disa thjesht për të përhapur atë që ishte hedhur tashmë në lumë.
“Ata donin të shmangnin turmat, por ata nuk donin të hiqnin dorë nga kjo traditë, kështu që ky është ndoshta një kompromis,” tha 51-vjeçari Thomas Bender për vendimin e papritur të qytetit.
“Kjo jep një dozë të jetës normale që jam i sigurt se shumë njerëzve u mungon,” shtoi ai.
Tradita e ngjyrosjes së lumit në Çikago filloi në 1962 me rastin e Ditës së Shën Patrikut, shenjt mbrojtës i Irlandës, e cila festohet më 17 mars. /tesheshi.com/
