Skena si ato të Rrugës së Kombit me kuksianë që u rebeluan ndaj traut të pagesës, ndodhur kjo pak vite më parë, janë shfaqur në Parkun e Divjakës, ku është vendosur një tra pagese për të gjithë vizitorët. Por banorët, edhe pse të përjashtuar nga kjo, nuk e kanë gëlltitur dot këtë risi të përfitimit financiar nga shteti, duke e parë këtë si një privim nga e drejta e tyre për të lëvizur lirisht aty ku jetojnë, të cilët e kanë parkun si shtëpinë e tyre.
Ndaj dhe janë përleshur më policinë, duke hequr madje kabinen e pagesës dhe traun.
Edhe pse krah tyre kanë qenë figura politike të opozitës, të cilët shfrytëzojnë maksimalisht zhvillime të tilla, kundër kësaj ka dalë dhe deputeti socialist i zonës, Erion Braçe.
“Ka një kakofoni që bëhet për interesa politike. Banorët e Bashkisë së Divjakës përjashtohen nga pagesa e këtij detyrimi, por kjo nuk ka rëndësi përderisa të tjerët ndalohen të kalojnë lirshëm. Për më të tepër që po vendoset në një vend që nuk garanton sigurinë rrugore. Kjo është e paligjshme.
Unë do të ndërmarr çfarëdolloj nisme që ta rrëzoj këtë projekt”, tha Braçe.
Kujtojmë se në pyllin e Divjakës është luajtur filmi “Pylli i Lirisë” me personazh kryesor Vlashin.
Ndaj është reflektuar kjo dhe në një parullë të protestës së banorëve. /tesheshi.com/
