Legjenda e Romës, kapiteni i Romës, Francesco Totti, është tashmë në fund të kontratës së tij, e cila përfundon në mbarim të qershorit të këtij viti. I gjendur në klub që nga viti i largët 1993, ai kërkon të luajë përsëri, por deri tani askush nuk i ka ofruar një kontratë të re.
“Koka i thotë diçka, e trupi diçka tjetër,” kështu e përshkruan situatën e 39-vjeçarit presidenti i klubit, James Pallotta.
“Ne kemi një problem të madh te Roma,” thotë Pallotta. “Francesco është 39 vjeç dhe ka ende cilësi dhe talent të madh, por unë mendoj se është e qartë për të dhe për të tjerët se ai nuk mund të luajë më në të njëjtën mënyrë siç ka bërë përpara.”
Presidenti ka vazhduar të flasë, “Trupi i tij thjesht nuk e lejon. Kontrata e tij përfundon këtë verë, e çdokush do një tjetër. Presioni te Roma që t’i ofroj një kontratë të re është i pabesueshëm.”
Kapitenit i është ofruar deri më tash një rol në organizmat drejtuese të klubit, por jo një kontratë për të luajtur të paktën edhe një vit.
“Ai do të jetë fytyra e Romës për 30 ose 40 vjet të tjera, apo gjithmonë,” thotë James Pallotta, “në një
tjetër rol.”
Rol që duket se Francesco Totti nuk është i gatshëm ta pranojë. Ai kërkon të jetë në fushë.
Më 8 mars atij iu dhurua një pritje e veçantë në “Santiago Bernabeu” të Madridit, në ndeshjen mes Realit dhe Romës për Champions League-n. Një stadium i tërë u ngrit në këmbë për të dhe e duartrokiti nxehtësisht kur hyri në lojë në 15 minutat e fundit. Diçka e rrallë për publikun madrilen, por që nuk ia kurseu romanit Francesco Totti.
Dilema nëse ai do të luajë ende apo do t’i thotë lamtumirë futbollit do zgjidhet vetëm pak muaj më vonë. E sigurt është se Totti kërkon të luajë. /tesheshi.com/
