Fitorja e mbrëmshme në “Etihad Stadium” përballë Manchester City-t u jep mundësi “gjelave” nga Londra të futen seriozisht në garë për titullin kampion, pasi tashmë gjenden vetëm dy pikë prapa kryesuesve të Leicester City-t.
Gjatë 45 minutave të para ekipet treguan më tepër kujdes që të mos gabonin sesa të krijonin raste në fazën ofensive, dhe kjo ishte arsyeja që munguan golat.
Ndërkohë, në pjesën e dytë ishin miqtë që arritën të gjenin golin e epërsisë përmes sulmuesit më të mirë të tyre, anglezit Harry Kane, i cili shënoi nga pika e 11-metërshit pas një vendimi shumë të diskutueshëm të gjyqtarit.
Barazpesha rivendoset pas 21 minutash, pikërisht në të 74-ën, kur vendasit e Manchester City-t e tundin rrjetën e portës kundërshtare me një gjuajtje të Iheanacho-s.
“Qytetarët” do të zhgënjeheshin sërish. Ata jo vetëm që nuk e gjetën golin e fitores, aq shumë të kërkuar, por pësuan një tjetër gol prej miqve. Një aksioni i nisur nga Lamela u konkretizua nga Christian Eriksen, si një dhuratë për ditëlindjen e tij. Rezultati 1-2 për Tottenham-in nuk do të ndryshonte gjer në fund, duke e bërë të jashtëzakonshme garën për titull, me katër skuadra të ngjeshura me njëra-tjetrën.
Kjo ishte humbja e dytë rresht e Manchester City-t ndaj pretendentëve. Një javë më herët do të humbiste me Leicester City-n, për të bërë të njëjtën gjë këtë të dielë po në shtëpinë e vet karshi Tottenham-it.
Fitorja në çastet e fundit e Arsenal-it ndaj Leicester City-t dhe e Tottenham-it ndaj Manchester City-t e kanë bërë të tillë tablonë e klasifikimit pas javës së njëzet e gjashtë të kampionatit anglez: Leicester-i vazhdon ta mbajë vendin e parë me 53 pikë, i ndjekur nga Tottenham-i dhe Arsenal-i me nga dy pikë më pak; Manchester City është në vend të katërt, paksa më i shkëputur, me 47 pikë. /tesheshi.com/
