Toto Cutugno s’vjen dot në Vlorë…!

Këngëtari, muzikanti dhe kompozitori italian Toto Cutugno ka vdekur në moshën 80- vjeçare, raportojnë mediat italiane.

Ai ndërroi jetë në spitalin e Milanos ku ishte shtruar.

Lajmi u konfirmua për agjencinë italiane ANSA nga menaxheri i tij Danilo Mancuzo, i cili shpjegoi se “gjendja e këngëtarit u përkeqësua pas një sëmundjeje të gjatë muajt e fundit”.

Cutugno fitoi konkurse dhe festivale të shumta në të gjithë Italinë, si dhe fitoi Eurovizionin në vitin 1990 në Zagreb me këngën “Insieme”.

Mori pjesë 13 herë në festivalin e famshëm në Sanremo, herën e parë në vitin 1976, me grupin “Albatross”, ku fitoi vendin e tretë.

Karrierën e pavarur e filloi në vitin 1978. Në vitin 1980 fitoi Sanremon me këngën “Solo noi” dhe gjashtë herë zuri vendin e dytë.

Në fundin e viteve ‘80-të dhe fillimet e ‘90-ës ishtë ndër këngëtarët italianë më të preferuar te shqiptarët.

Sipas asaj çfarë shkruan Rama pas këtij lajmi të zi për artin italian, i ndjeri mund të vinte në Vlorë këtë verë.

“Ju ishit një italian i madh e i vërtetë! Supozohej të takoheshim këtë verë në Vlorë, por Zoti vendosi të të lërë të prehesh në paqe! Këngët e tua mbeten të regjistruara përgjithmonë me ne, në zemrat e shumë shqiptarëve.

Faleminderit për gjithçka Toto Cutugno, ishte një privilegj të jetoja në të njëjtën kohë me një legjendë si ju!”, shkruan Rama pasi ndan një playlist me këngët më të njohura. /tesheshi.com/