Totenhemi barazon në mënyrë të papritur në fushën e vet ndaj Uest Bromuiçit, duke ia bërë edhe më të mundshme Lestërit fitimin e kampionatit anglez.
Shtatë pikët tashmë mes Lestërit të vendit të parë në Premier Ligë dhe Totenhemit të vendit të dytë janë një hendek vështirë i mbyllshëm nga londinezët. Mjafton që Lestëri të fitojë këtë të dielë ndaj Mançester Junajtedit në transfertë, e gjithçka merr fund. Titulli më pas i shkon Lestër Sitit.
Totenhemi ishte i vënë nën presion pas fitores 4-0 së Lestër Sitit ndaj Suonsi Sitit. Presion që u reflektua në rezultatin përfundimtar të ndeshjes së luajtur mbrëmjen e ditës së shkuar.
Totenhemi e mbylli 1-1 sfidën ndaj Uest Bromuiçit. Mbrojtësi Craig Dawson do të shënonte një autogol në minutën e 33-të, duke i kaluar vendasit në epërsi. I njëjti lojtar do të shlyente gabimin në pjesën e dytë, duke barazuar në minutën e 73-të.
Mauricio Pochettino, trajneri i Totenhemit, do të deklaronte pas ndeshjes se ekipi i tij nuk do të dorëzohej, edhe pse çështja e titullit ishte vështirësuar goxha pas këtij barazimi.
“Matematikisht është ende e mundur. Ne duhet të luftojmë për pikët. Duhet të besojmë ende. Eshtë e vështirë. Ne nuk do të dorëzohemi.”
Kurse trajneri i Uest Bromuiçit, Tony Pulis, do ta mbështeste fort Lestërin në fjalët e tij pas takimit: “Unë thjesht dua të fitojë Lestëri. Lestëri është një histori e mrekullueshme, dhe nuk mendoj se kjo mund të ngjasë diku tjetër veçse në këtë vend.”
Ashtu si Lestëri, dhe Totenhemi ka një ndeshje shumë të vështirë përpara. Të hënën do i duhet të luajë në derbin londinez në “Stamford Bridge”, ndaj Çelsit.
Të gjitha gjasat janë që e shumta në orët e vona të së hënës që vjen ta mësojmë emrin e skuadrës kampione të Premier Ligës. /tesheshi.com/
