Fernando Torres luajti një ditë më parë ndeshjen e tij të fundit si futbollist profesionist.
“El Nino” e mbylli karrierën në Japoni, me gjashtë gola të shënuar në 39 aktivizime për Sagan Tosu.
Ai pati si kundërshtar në ndeshjen e fundit Iniestën dhe David Vilën, dy lojtarët e Visel Kobesë.
Torres e kishte shkëlqimin me Atletikon e Madridit dhe Liverpulin, luajti gjithashtu për Çelsin dhe Milanin, dhe e veshi 110 herë bluzën e Spanjës. Me të fitoi Kupën e Botës në 2010-n dhe Europianin në 2008-n dhe 2012-n, edhe duke shënuar në finale.
Një letër e shkruar nga Torres ishte vendosur në çdo ndenjëse të stadiumit në ndeshjen e tij të fundit, për t’u lexuar e për t’u marrë me vete prej tifozëve.
“Nisa të luaja futboll me tim vëlla kur isha pesë vjeç. Tridhjetë vite më vonë do të luaj ndeshjen time të fundit si profesionist. Sot kthej sytë prapa dhe vështirë ta besoj gjithçka që kam jetuar. Ndihem shumë me fat që kam qenë në gjendje të fitoj trofetë më të rëndësishëm në botë dhe të luaj për disa prej klubeve më me prestigj… Faleminderit, futboll!”
Një letër po kaq emocionuese i kushtoi atij Iniesta, të botuar në “El Mundo”, e ku i thoshte se, “… nuk ka thesar më të madh se miqësia juaj, Fernando. Do të jesh gjithmonë El Nino!”. /tesheshi.com/
