Krahas futbollit, i cili kërkon përkushtim shumë të madh për të qenë i suksesshëm, disa yje shqiptarë e praktikojnë maksimalisht edhe fenë Islame, të cilës i takojnë. “Zëri” ua sjell kampionët fetarë, që janë emra të mëdhenj edhe në futbollin evropian
Shumë futbollistë shqiptarë tashmë janë bërë emra të njohur e të mëdhenj në Evropë. Dhe, si të tillë që janë, çdo veprim i tyre përcillet me kujdes të veçantë.
Në kuadër të vëzhgimit të vazhdueshëm, shumë yje të futbollit shqiptarë janë vërejtur se janë shumë të dhënë edhe pas fesë, krahas futbollit, shkruan gazeta Zëri, në versionin e vet online.
Shumica prej tyre i përkasin Islamit. Por, disa nga ta kanë konfirmuar se janë besimtarë shumë të devotshëm. Një gjë të tillë së fundmi e bëri Shkodran Mustafi.
Kampioni botëror me Gjermanin, të shtunën, nëpërmjet rrjetit social ia uroi nënës së tij ditëlindjen, nëpërmjet një thënie të Profetit Muhamed. “Profeti Muhamed ka thënë: ‘Parajsa është ndër këmbët e nënës’. Urime Ditëlindjen”, kishte shkruar futbollisti shqiptar nga Maqedonia, i cili është bërë lojtar i rëndësishëm i Valencias.
Duke e përsëritur këtë thënie të Profetit Muhamed, Mustafi dëshmoi se e njeh në thelb Islamin.
Xherdan Shaqiri, fetar i madh
Ndër futbollistët shqiptarë që e praktikojnë maksimalisht fenë islame është edhe Xherdan Shaqiri. Ylli i Zvicrës dhe i Interit këtë e ka dëshmuar me dhjetëra herë. Çdo festë islame futbollisti nga Zhegra ua uron besimtarëve nëpërmjet rrjeteve sociale, raporton Zëri.info.
Ai fal edhe namaz. Por, jo vetëm kaq. Edhe e agjëron Ramazanin. Siç dihet, Kampionati Botëror “Brazili 2014” u zhvillua në të njëjtën kohë me muajin e Ramazanit.
Mediet botërore shkruanin se si do të gjendet Shaqiri në atë rast: do të agjërojë apo do të heqë dorë nga agjërimi për ta ndihmuar maksimalisht Zvicrën. 23-vjeçari e kishte zgjedhur këtë të dytën, pasi edhe vera ishte shumë e nxehtë në Brazil, por besohet se ditët e humbura pa agjëruar, Shaqiri i ka zëvendësuar pas Botërorit. Por, kjo ende nuk është e konfirmuar.
Përndryshe, sa luante në Bayern Munich, Shaqiri iu është shmangur festave me birra (pije alkoolike të ndaluara me fenë islame), kur ekipi i tij fitonte trofe. Kur ka shënuar ka pasur raste kur është parë duke e falënderuar Zotin.
Kalimi i tij në Inter ishte arsyetuar me disa raportime, kinse klubi italian ia ka mundësuar ta praktikojë maksimalisht fenë e tij.
Mavraj e Azemi, të devotshëm
Përkushtimi i madh në fenë islame është vërejtur edhe tek Mërgim Mavraj, i cili madje mund të konsiderohet si “kampion fetar”. Mbrojtësi i Kolnit edhe për mediet gjermane ka rrëfyer se sa është i përkushtuar për t’i kryer obligimet që ia përcakton feja e tij.
“Unë jam shumë fetar dhe merrem shumë me veten time. Sa shpesh luteni? Pesë herë në ditë. Lutja në vetvete është po ashtu një lloj meditimi. Shokët e mi më respektojnë plotësisht. Unë kur jam në autostradë, shkoj në një parking dhe falem. E bëj atë pothuajse kudo, pasi është diçka normale për mua. Kjo është jeta ime”, kishte deklaruar Mavraj për “Bildin” gjerman, derisa ka bërë foto edhe nëpër xhami, por edhe duke e mbajtur në dorë librin e shenjtë, Kuranin, shruan Zëri.
Sikurse Mavraj, në fe është i përkushtuar maksimalisht edhe sulmuesi i Kosovës, Ilir Azemi.
Sa luanin bashkë me Mavrajn në Greuther Furth, bashkë faleshin dhe bashkë luteshin dhe agjëronin.
Para pak kohësh, Azemi e pësoi një aksident në trafik. Dhe fjalët e para të tij pas daljes nga gjendja kome, ishin ato falënderuese për Zotin që ia shpëtoi jetën. Ndërsa sot, lutet që t’u kthehet sa më shpejt fushave…
Cana fal namaz
Lorik Cana është një tjetër mysliman dhe besohet se e praktikon goxha shumë fenë islame.
Futbollisti më i dashur te tifozët shqiptarë thuhet se fal namaz, ndërkohë më moti në rrjetet sociale ishte shpërndarë një foto, në të cilën kapiteni i Shqipërisë shihej duke shkruar në gjuhën arabe “Allahu Ekber”, që në shqip do të thotë “Zoti është më i madhi”.
Por mbetet enigmë vërtetësia e asaj fotografie. Në dallim prej të tjerëve, publikisht Cana më shumë merret me çështje kombëtare sesa fetare, shkruan Zëri.
Edhe plot të tjerë…
Përpos Shaqirit, Mustafit, Canës, Mavrajt e Azemit, edhe shumë futbollistë të tjerë shqiptarë janë deklaruar publikisht se i përkasin fesë islame.
Shumica nga ta kanë pohuar se mundohen ta praktikojnë fenë e tyre, aq sa munden, por ende nuk janë vërejtur si të tjerët, të lartpërmendur. /tesheshi.com/
