Ish-kryetarja e Kuvendit, Jozefina Topalli, ka vijuar me sulmet dhe akuzat ndaj kreut demokrat, Lulzim Basha, madje edhe përsa i takon lëvizjes së tij më të fundit për reformën zgjedhore.
Kushtet që Basha i publikoi një ditë më parë ndaj mazhorancës për realizimin e kësaj reforme, Topalli i cilëson si hipokrizi dhe tradhti ndaj PD-së.
“Sistemi politik nuk reformohet përmes reformës zgjedhore, ai reformohet përmes reformës së klasës politike, d.m.th të partive politike. Kjo do të thotë përmes rritjes së demokracisë, të zbatimit të statutit, gjëra të cilat nuk kanë ndodhur gjatë kësaj periudhe në të cilën ka drejtuar Lulzim Basha“, tha Topalli.
Në vijim ajo kundërshton aplikimin e teknologjisë në zgjedhje duke i kërkuar Bashës të sqarojë demokratët se çfarë fshihet pas këtij kushti të përmendur disa herë gjatë këtij viti prej tij.
“Herën e parë e filloi si betejë, bëri gjoja, ngriti çadrën, tradhtoi çadrën, bëri marrëveshjen dhe humbi zgjedhjet me minus 230 mijë vota.
Tani pyetjet që ai duhet t’u sqarojë demokratëve janë: me votimin elektronik kërkon që të heqë kontrollin politik, kontrollin e demokratëve mbi procesin zgjedhor? Është pyetje e rëndësishme që ua ka borxh demokratëve.
A do të thotë kjo, se ai nuk i beson sistemit të kontrollit partiak, por i beson firmave private qoftë kjo e Beqjas apo kunatit?
Dhe e treta, a do të vazhdojë ai kundër të gjithë komunitetit ndërkombëtar që dëshmojnë dështimin e një sistemi të tillë në vende të tjera, edhe të kontinenteve të tjera, edhe brenda kontinentit tonë, si dikur Enver Hoxha që dikur me shpatë në dorë çante rrugën drejt socializmit?”,thotë Topalli.
Në lidhje me ndryshimin e sistemit zgjedhor dhe idesë se shprehur me herët nga Basha për një sistem mazhoritar, Topalli akuzon kreun e PD-së se kërkon një sistem, i cili dëmton demokratët dhe i jep peshë krimit e parave të pista.
“Nëse sistemi ka qenë mazhoritar dhe ka kaluar në proporcional, cilat kanë qenë arsyet që e kemi bërë një gjë të tillë? Apo në projektin e tij synon që të bëjë marrëveshje me krimin, grupet kriminale dhe paratë për të marrë kolegjet zgjedhore? Apo kërkon që të reduktojë Partinë Demokratike vetëm në 5 karrige në parlament? Besoj që ua ka borxh demokratëve që ta sqarojë edhe një gjë të tillë“, thekson Topalli.
Ju besoni që sistemi mazhoritar nuk e favorizon PD?
Në kushtet kur vendos paraja e pisët, grupet kriminale, në situatën që gjendemi sistemi mazhoritar është tërësisht nga paraja, e vetmja mënyrë për të marrë kolegjet elektorale do të jetë pakt me krimin dhe me paranë”.
Hipokrizi është edhe kërkesa e Bashës për një sistem, i cili zvogëlon kompetencat e kryetarit ne hartimin e listës. Ne nuk kërkojmë një kryetar të dobët, ne kërkojmë një kryetar statutor, që të respektojë ligjin, kushtetutën, statutin e PD të cilin e ka shkelur që ditën e parë që ka zënë dhe ka uzurpuar karrigen e kryetarit të partisë. Edhe në shtator e ka shkelur përsëri statutin, dhe nuk po flas për të gjitha shkeljet e 4 viteve të kaluara. Dy nënkryetarët e PD janë të votuar nga grupi, statuti i PD kërkon bashkë edhe me të gjithë preçedentët e zgjedhjeve në PD në 20 e ca vite, ata duhen votuar në këshillin kombëtar, pra kryetari përsëri ka shkelur statutin.”
-A jeni dorëzuar në betejën tuaj për të ringritur PD, në betejën kundër Lulzim Bashës?
Jozefina Topalli nuk bën hapa prapa. /tesheshi.com/
