Patozi i “Bindjes” dhe Topalli e “Ndryshimit”, dy ish-numrat 2 të PD-së, do jenë bashkë për zgjedhjet e 25 prillit, duke besuar se do suprizojnë me rezultatet e tyre.
“Ne kemi profile të ndryshme ndoshta, nuanca të ndryshme që edhe na dallojnë nga njëri-tjetri, por kemi një kauzë të përbashkët që është ndryshimi i politikëbërjes në Shqipëri dhe nga ana tjetër kemi interesa elektorale që na bashkojnë, se në rast se garojmë më vete do e kishin më të lehtë partitë e vjetra për të na spostuar apo copëzuar në zgjedhjet e 25 prillit”, tha Patozi, duke saktësuar: “Kemi rënë dakord parimisht për një bashkëpunim që i bie listë e përbashkët. Me Jozefina Topallin dhe me këdo tjetër që ju shkon ndërmend që nuk bën pjesë te lista e kundërshtarëve politikë dhe që është i hapur për bashkëpunim”.
Ai beson se mund t’ju japë një shuplakë si mazhorancës e si opozitës jashtëparlamentare, në të cilën bën pjesë dhe ish-partia e tij.
“Ata mendojnë se opozita është lloj prone dhe kushdo që futet u rrëmben diçka nga copa e tyre. Opozita është mision. Mund të thonë çfarë të duan për ne, ne ose do i injorojmë, ose do i kthejmë ndonjë shpullë të lehtë”, tha Patozi. /tesheshi.com/
