Pas gati 15 vitesh në politikë aktive, Ben Blushi është rikthyer në media duke u emëruar Drejtor i Përgjithshëm i Top Channel-it. Njoftimi është bërë nga pronarja e këtij televizoni, e veja e të ndjerit Dritan Hoxha-themelues, Vjollca Hoxha.
“Kam kënaqësinë të njoftoj të gjithë shikuesit dhe punonjësit e Top Channel se duke filluar nga sot z.Ben Blushi do të jetë Drejtor i Përgjithshëm i Top Channel.
Si një gazetar, shkrimtar dhe politikan që ka vendosur pavarësinë dhe të vërtetën mbi çdo interes, jam e bindur se z.Blushi do të ndihmojë Top Channel për të hapur një cikël të ri komunikimi dhe informimi me të gjithë dashamirësit tanë në krejt hapësirën shqipfolëse.
Dua t’i siguroj të gjithë se Top Channel i mbetet besnik parimeve tona si një media e lirë, e pavarur dhe profesionale, e cila ka qenë, është dhe do të jetë përherë në shërbim të së vërtetës dhe lirisë së informimit”, shprehet znj. Hoxha në një komunikim me publikun.
Kujtojmë se karriera e Blushit si gazetar, përfshin të qënit redaktor i RD-së në vitet e para të saj, e më pas kryeredaktor i Koha Jonë në zenithin e saj. /tesheshi.com/
