Nga Blendi Gashi
Viti 2015-të ishte vërtetë sfidues për Kosovën, ku përveç mosfunksionimit të Kuvendit, do të mbahet mend edhe për top-dështime, përjashtuar ato të zakonshmet siç ndodhin çdo vit si (mos)luftimi i korrupsionit dhe krimit të organizuar, (mos)zhvillimi ekonomik, (mos)hapja e vendeve të reja të punës etj.
Por edhe viti që sapo ka hyrë 2016-ta, nuk pritet të jetë aspak i lehtë për shtetin që u krijua para 8 vitesh, ku tronditjet prapë do të shkaktohen nga politika.
Por cilat ishin top-dështimet e vitit të kaluar dhe çfarë sfida e presin sivjet Kosovën, mund t’i lexoni më poshtë;
(Mos)liberalizimi i vizave – padyshim është dështimi më i madh në vitin që lam pas.
Që në vitin 2010 ish kryeministri Hashim Thaçi, në fushatën elektorale kishte premtuar se qytetarët e Kosovës do të lëviznin pa viza në të gjitha vendet e Shengenit.
Një premtim të tillë Thaçi e kishte dhënë edhe më 2013-të duke harruar atë të dhënë para tre viteve, por të dy premtimet dolën të jenë boshe pasi vizat nuk u hiqën.
Edhe kryeministri aktual Isa Mustafa pasi mori drejtimin e Qeverisë ishte i bindur se në vitin 2015-të kosovarët do të lëvizin lirshëm por edhe ai dështoi.
Pasi Kosova dështoi të marrë liberalizimin politikanët kryesorë janë shprehur të bindur se viti 2016-të përfundimisht do të jetë vit i heqjes së kufizimit të lëvizjes së lirë për kosovarët në shtetet e Bashkimit Evropian.
Mbetet të shihet nëse do t’ia qëllojnë këtë herë politikanët apo duhet të deklarohen në fund të vitit se për arsye të ndryshme liberalizimi është shtyrë për vitin 2017-të.
(Mos)bërja e ushtrisë së Kosovës – është dështimi tjetër i madh që ndodhi vitin e kaluar.
Edhe në këtë temë protagonist është ish kryeministri Thaçi i cili më 18 shkurt të vitit 2014-të përmes një shkrimi në Facecbook kishte paralajmëruar se së shpejti do FSK do të shndërrohet në Forca të Armatosura të Kosovës.
Pavarësisht faktit se amendamentet të cilat i hapin rrugë transformimit të FSK-së në FAK, kanë kaluar nëpër të gjitha procedurat e nevojshme ligjore, këto amendamente vazhdojnë të mbesin në sirtarët e Kuvendit dhe kështu edhe një premtim i Thaçit nuk u realizua.
Për të bërë ushtrinë dështoi edhe kryeministri Mustafa në vitin e parë të qeverisjes dhe për këtë meritat më të mëdha i ka Lista Serbe që dirigjohet nga Beogradi e që është në koalicion me PDK-në LDK-në që po e bllokon formimin e ushtrisë.
Derisa ‘Srpska’, ka paralajmëruar sërish se nuk do të votoj për ushtrinë e Kosovës, ministri i FSK-së Haki Demolli beson se ushtria do të formohet këtë vit.
Mbetet të shihet se cila do të jetë formula, apo cila do të jetë kompromisi që ‘Srpska’ të lëshoj pe dhe të votoj ushtrinë pasi pa votat e tyre fatkeqësisht Kosova nuk mund ta ketë ushtrinë.
(Mos)anëtarësimi i Kosovës në UNESCO – ishte një pikëllim tjetër i madh për kosovarët në vitin 2015-të. Me gjithë përpjekjet dhe lobimet Kosova nuk arriti të anëtarësohej në Organizatën për Edukim, Shkencë dhe Kulturë e Kombeve të Bashkuara pasi nuk arriti të siguroi 2/3 e votave të nevojshme.
Edhe pse dështuan ta anëtarësojnë vendin në këtë organizatë drejtuesit e shtetit e quajtën fitore marrjen e 92 votave, derisa opozita kosovare deklaroi se ministri i Jashtëm Hashim Thaçi duhet të jap dorëheqje, por sigurisht që një gjë e tillë nuk ndodhi.
Super-sfidat e 2016-tës që e presin Kosovën
Shumë sfida të mëdha dhe paqartësi e presin Kosovën edhe vitin që sapo jemi hyrë.
Fjalën kryesore padyshim se do ta ketë politika me tronditjet që pritet të ndodhin e që besohet se do të jenë jo të pakta.
Se do të jetë një vit jo i lehtë ka paralajmëruar edhe kryetar i i Kuvendit, Kadri Veseli, i cili ka ftuar jo vetëm partitë dhe institucionet, por edhe mediat që të jenë gati.
“Do të jetë një vit jo i lehtë. Unë besoj do të jetë një nga vitet më të rënda që nga paslufta në Kosovë. Duhet të përgatitemi, si ne politikanët, po ashtu edhe ju mediat”, ka theksuar Veseli.
Vazhdimi i ‘show’-ut në Kuvend
Sfida e parë do të jetë (mos) funksionimi i Kuvendit, konkrektisht përplasja pozitë-opozitë për Asociacionin e Komunave me shumicë serbe apo siç e quan opozita e bashkuar ‘Zajednica’ dhe për Demarkacionin me Malin e Zi.
Pritet vazhdimi i ‘show’-ut, gjuajtjes së gazit lotsjellës në sallën e seancave plenare nga opozita kosovare, gjithmonë nëse nuk arrihet një pajtueshmëri mes palëve për çështjet në fjalë, por që sipas rrethanave aktuale vështirë mund të ndodh të paktën këtë muaj.
Protestat, ‘rrëzimi’ i Qeverisë, zgjedhjet e reja…
Vazhdimi i protestave do të jetë një sfidë për qeverinë aktuale. Opozita e bashkuar më 9 janar do të proteston në Prishtinë kundër dy marrëveshjeve Asociacionit dhe Demarkacionit, derisa pritet të kërkoj edhe dorëheqjen e qeverisë.
Tri partite e bllokut opozitar VV, AAK, NISMA kanë paralajmëruar se nuk do t’i ndalin protestat derisa të largojnë nga pushteti siç i quajnë shkelësit e Kushtetutës, dyshen Thaçi-Mustafa.
Opozita e bashkuar thotë se pas vendimit të Gjykatës së Kushtetueses se është shkelur Kushtetuta me nënshkrimin e dy marrëveshjeve e vetmja rrugë është mbajtja e zgjedhjeve të reja, opsion të cilin po e kundërshton aktualisht pushteti.
Se vendi po rrëshqet drejt zgjedhjeve të reja e kanë thënë disa herë edhe analistët politik të cilët mendojnë se qytetarët mund t’iu drejtohen kutive të votimit në pjesën e dytë të vitit.
Specialja në ‘aksion’
Pas themelimit vitin e kaluar nga Kuvendi i Kosovës, Gjyakta Speciale pritet që këtë muaj ose në shkurt të del me aktakuza zyrtare.
Sipas raportimeve të mediave rreth 13 ish udhëheqës të UÇK-së pritet të ballafaqohen me drejtësinë ndërkombëtare. Nëse vërtet Specialja nis’aksionin’, padyshim se kjo do të jetë top-ngjarja e vitit që padyshim se pritet të shkaktoj edhe tollovi të madhe.
Heqja e vizave dhe bërja ushtrisë, sfida edhe këtë vit
Liberalizimi i vizave dhe formimi i ushtrisë edhe këtë vit do të jenë ndër sfidat kryesore në vend.
Për të udhëtuar pa viza qytetarët kosovarë institucionet udhëheqëse të Kosovës duhet të realizojnë tetë kriteret e kërkuara nga Bashkimi Evropian.
Kurse, për t’u bërë ushtria, Qeveria aktuale duhet të bind Listën Serbe të votoj pro transformimit të FSK-së në FAK.
Zgjedhja e presidentit
Tjetër sfidë që pritet ta kaloj vendi është edhe zgjedhja e presidentit, ku procesi zhvillohet në Kuvendin e Kosovës. Pikërisht në muajin mars do të kuptohet nëse kandidati i vetëm deri më tani Hashim Thaçi do të arrinë të zgjedhet si i pari i shtetit, gjë që është e paraparë sipas marrëveshjes së koalicionit PDK-LDK.
Kjo do të jetë një sfidë për politikën kosovare pasi nëse Thaçi nuk arrinë të ulet në karrigën që aktualisht e mban Atifete Jahjaga, vendi sipas të gjitha gjasave do të shkoj në zgjedhje.
Disa deputetë të LDK-së dhe opozita fuqishëm e kundërshtojnë zgjedhjen e Thaçit në pozitën e të parit të shtetit, derisa kryeministri aktual Isa Mustafa ka deklaruar se marrëveshja e koalicionit do të zbatohet dhe se në 5 vitet e ardhshme kreu akutal i PDK-së do të jetë president i vendit.
Derisa, Thaçi ditët e fundit duke folur për këtë çësthje ka deklaruar se nuk e ka betejë jetësore të bëhet president, duke thënë se ka pasur mundësi 2-3 herë më parë të zgjidhet në këtë pozitë.
…dhe shumë sfida të tjera
Përveç temave që cekëm më lartë sigurisht që para vetës Kosova ka edhe shumë sfida të tjera që edhe pas 15 viteve nga liria dhe 8 viteve nga pavarësia vazhdojnë të jenë brengë e përditshme e kosovarëve, si mungesa e zhvillimit ekonomik, mungesa e funksionimit në gjykata dhe prokurori, pa punësia e madhe, cilësia e dobët në arsim, shëndetësi etj. /tesheshi.com/
