Ish-kryeministri britanik Tony Blair mohoi kategorikisht se kishte pasur ndonjë diskutim në Izrael për zhvendosjen e palestinezëve nga Gaza, siç raportohet nga një rrjet televiziv izraelit.
Sipas medias izraelite Channel 12, Tony Blair, i cili u largua nga posti i kryeministrit në 2007 dhe në atë kohë ishte i dërguari i Lindjes së Mesme i ngarkuar me krijimin e institucioneve palestineze, ishte në Izrael javën e kaluar.
Ai pati takime me kryeministrin Benjamin Netanyahu dhe Benny Gantz, një anëtar i kabinetit të luftës, rreth një roli ndërmjetësues të pasluftës me Hamasin, raportoi Channel 12.
Sipas këtij kanali, ai gjithashtu mund të veprojë si një ndërmjetës me shtetet e moderuara arabe për një “zhvendosje vullnetare” të gazanëve.
Por fondacioni i Tony Blair, Instituti Tony Blair për Ndryshim Global, i përshkroi këto pretendime si “gënjeshtra”.
Ato u publikuan “pa asnjë kontakt me Tony Blair dhe ekipin e tij”. “Asnjë diskutim i këtij lloji nuk u zhvillua,” tha organizata në një deklaratë të lëshuar dje, të hënën në mbrëmje.
“Tony Blair nuk ka pasur një diskutim të tillë, pasi ideja është e gabuar në parim. Gazanët duhet të jenë në gjendje të qëndrojnë dhe të jetojnë në Gaza”.
Presidenca palestineze hodhi poshtë “çdo përpjekje të dyshimtë” për të emëruar Blair “ose ndonjë person tjetër që të jetë përgjegjës për dëbimin e palestinezëve nga Gaza”, duke denoncuar një “veprim të dënueshëm”, në një deklaratë të transmetuar nga agjencia palestineze e lajmeve Ëafa.
“Ne kërkojmë nga qeveria britanike të mos lejojë ndërhyrjen në fatin dhe të ardhmen e popullit palestinez”, shtoi presidenca, duke paralajmëruar se “Tony Blair nuk është i mirëpritur në territoret palestineze”.
Të dielën, ministri izraelit i financave Bezalel Smotrich mbrojti kthimin e kolonëve hebrenj në Rripin e Gazës pas luftës.
Dy ministra izraelitë të ekstremit të djathtë, Bezalel Smotrich dhe Itamar Ben Gibr, kanë thënë ditët e fundit se Izraeli duhet të “inkurajojë” rreth 2.4 milionë palestinezë në Gaza që të largohen nga rajoni për në vende të tjera.
Hamasi, i cili është në pushtet në Rripin e Gazës, i dënoi ashpër këto deklarata.
Në dhjetor, Sekretari i Përgjithshëm i OKB-së Antonio Guterres dhe shefi i UNRWA Philippe Lazzarini paralajmëruan kundër “përpjekjeve” për të dëbuar palestinezët në Egjipt.
Zhvendosja e një popullsie nga toka e saj është e ndaluar nga Konventat e Gjenevës, të cilat përbëjnë “zemrën” e së drejtës ndërkombëtare humanitare.
Operacionet ushtarake izraelite në Rripin e Gazës kanë vrarë të paktën 22,000 njerëz, kryesisht gra, fëmijë dhe adoleshentë, që nga fillimi i luftës më 7 tetor, sipas të dhënave të fundit të publikuara nga Hamasi.
Dhe kujtojmë se drama palestineze nis me krijimin e shtetit izraelit në 48-ën, një inisiativë britanike dhe përgjithësisht perëndimore, si një gur për të vrarë dy zogj: njëri, pastrimi i Europës nga hebrenjtë e tjetri, krijimi i një çibani hebre në Lindjen e Mesme mes shteteve arabe, në funksion kjo të interesave perëndimore. Më saktë, duke e përdorur Izraelin si një lloj sateliti gjeopolitik agresiv kundër popullsive arabo-islame. /tesheshi.com/
