Nga Blendi Gashi
Deportimi në Shqipëri i Sekretarit për Marrëdhënie me Jashtë të Lëvizjes Vetëvendosjes, Bojken Abazi nga organet e rendit të Kosovës ka çuar shumë pluhur duke bërë të reagojë jo vetëm lëvizjen Vetëvendoje, por edhe Ambasadën e Shqipërisë në Kosovë, si dhe organizma të tjera.
Policia e Kosovës në arsyetimin e dhënë, shprehet se deportimi i Abazit ka ndodhur konform Ligjit për të huajt, pasi personi në fjalë ka hyrë në Kosovë në mënyrë ilegale.
Por, vetë Abazi e ka mohuar një një të tillë duke thënë se ai ka hyrë në Kosovë krejtësisht në mënyrë legale përmes pikës kufitare në Morinë.
Kurse partia që militon Abazi, Vetëvendosje dëbimin e Abazit e ka cilësuar ‘kidnapim’ dhe vendim të motivuar politikisht nga qeveria dhe kryeministri i Kosovës.
Për deporitmin e Abazit ka reaguar edhe ambasadori i Shqipërisë në Kosovë Qemal Minxhozi, i cili tha se ka paqartësi lidhur me veprimet e Policisë së Kosovës dhe se informatat për deportimin e Abazit janë kontradiktore.
“Ky deportim duhet të ishte bërë në bazë të ligjeve që ka Kosova, nuk kam njohuri të thella për këtë problem, nuk jam i qartë nëse arrestimi ka qenë me një urdhër arrest. Nuk e di nëse ka qenë në përputhje me të drejtat e njeriut. Janë disa pikëpyetje që duhet të zgjidhen. Kam njoftimin që e ka dhënë policia, që s’ka vepra penale, por është thënë që ka pasur raste në të kaluarën, është goxha kontradiktore. Nuk jam i qartë sa e kanë parë institucionet e sigurisë rrezikshmërinë e këtij personi”, ka deklaruar Minxhozi, për mediat kosovare.
Avokati i Boiken Abazit: Sot dorëzojmë ankesën në MPB
Portal tesheshi.com ka kontaktuar edhe me Tomë Gashin, avokati i Bojken Abazit, i cili ka bërë të ditur se sot do ta dorëzojnë ankesën në Ministrinë e Punëve të Brendshme kundër deportimit, siç ka thënë “të paligjshëm të Abazit”.
Avokati Gashi tha se veprimi për të dëbuar Abazin është fyes për të gjithë shqiptarët, dhe i tillë që as regjimi pushtues i Serbisë nuk e ka përdorur.
“Ne kemi ardhur në një situatë ku shqiptarët paraqesin rrezikshmëri për shqiptarët sipas shtetit të Kosovës. Unë e di që as pushteti i Serbisë deri më tani nuk ka vepruar në mënyrë të tillë deri në vitin 1999, pasi më pastaj nuk ka pasur pushtet ekzekutiv.
Është e paimagjinueshme që në shtetin e Kosovës të sillet një vendim i tillë, që është fyes për të gjithë shqiptarët”, ka deklaruar Gashi për tesheshi.com.
Më tej avokati Gashi ka deklaruar se si mund të ndodhë që një person i cili konsiderohet rrezik për shtetin, i njëjti të dërgohet në zonën neutrale.
“Nëse është e vërtetë që Bojken Abazi paraqet rrezik për shtetin e Kosovës, ai nuk është dashur që të deportohet, por që të arrestohet, paraburgoset dhe gjykohet në shtetin ku ai paraqet rrezik. Skandali tjetër është që policia, duke parë atë që ka krijuar vet, demantoi se Bojken Abazi paraqet rrezikshmëri. Nëse në dokumentin që është Urdhër për Largim me Forcë nuk janë arsyet që përmenden, atëherë kjo është e çuditshme”, ka deklaruar Gashi, për tesheshi.com.
Ndryshe, Policia e Kosovës gjatë kësaj periudhe kohore të vitit 2016, deri me tani i ka larguar, dëbuar tetë (8) persona shtetas të Shqipërisë, të cilët kanë rënë në kundërshtim me ligjin për të huaj, respektivisht për qëndrim të pa ligjshëm në Republikën e Kosovës.
Ligji Neni 99
“Procedurat e zbatimit të urdhrit të dëbimit
- Urdhri i dëbimit jepet nga Departamenti për Shtetësi, Azil dhe Migrim (DSHAM) dhe zbatohet nga Policia Kufitare, e cila:
1.1. merr masa për ndalimin e të huajit në Qendrën e Mbajtjes, ose zbatimin e masave të përkohshme të përcaktuara në këtë ligj, derisa të zbatohet urdhër dëbimi;
1.2. merr shenjat e gishtërinjve dhe të pëllëmbës së dorës të të huajit, fotografinë dhe shenjat biometrike;
1.3. regjistron urdhrin për dëbim në bazat përkatëse të të dhënave, ku shënohet periudha e ndalimit të hyrjes në Republikën e Kosovës dhe pikën e kalimit kufitar të largimit të të huajit;
1.4. inicion pranë institucioneve përgjegjëse marrjen e masave të parapara për pajisje me fletudhëtim, sigurimin e kthimit në vendin e origjinës dhe biletën e udhëtimit.
- Urdhri i dëbimit zbatohet menjëherë, në rast se prania e të huajit përbën kërcënim për rendin dhe sigurinë shtetërore.
- Në rast se as i huaji e as ftuesi nuk kanë mundësi financiare për të përballuar shpenzimet e kthimit të të huajit në vendin e destinacionit, shpenzimet e udhëtimit do të jepen si hua në paradhënie nga MPB-ja dhe do të kthehen nga ftuesi në rast se i huaji kërkon të vijë në Republikën e Kosovës pas përfundimit të afatit të ndalimit të hyrjes ose nga punëdhënësi i tij i ardhshëm”.
/tesheshi.com/
