Tomas Strakosha pa limite, nga portieri zbulim i vitit, tek ëndra e Champions League

Viti 2017 ka qenë viti i Tomas Strakoshës në Itali dhe portieri shqiptar i
Lazios, nuk do t’i vërë kufi vetes. Nga një djalë modest që stërvitej fort,
nën kujdestarinë e rreptë të të atit, ish portierit të famshëm të
Shqipërisë Foto Strakosha, 21 vjecari e ka fituar në fushë cdo
kompliment që sot i “vërshon” nga e gjithë Italia. Mediat italiane vijojnë
të shkruajnë për portierin shqiptar, emri i të cilit po qarkullon cdo ditë e
më shpesh në dyert e klubeve si Juventus e Milan. Nga hyrja “rastësore”
në formacionin e Lazios, për shkak të dëmtimit të portierit të parë
Marchetti, e deri më sot, Tomas ka bërë hapa stratosferikë përpara, e
tashmë është kthyer në titullar të padiskutueshëm për Lazion. Madje i
ka bindur drejtuesit e klubit roman, t’i rishohin kontratën, që jo vetëm
të kenë garanci për të ardhmen, por edhe t’ia rrisin vlerën në treg, nëse
dikush nga “të mëdhenjtë” bën ofertë. Duke i njohur shumë atribute
trajnerit Simone Inzaghi për aktivizimin, Strakosha kërkon që viti 2018,
ta ngjisë me Lazion e tij, në kompeticionin e Champions League. “Duhet
të vazhdojmë kështu edhe në 2018. Me Interin luajtëm denjësisht dhe
mund të kishim marrë edhe fitoren. Megjithatë, vërtetuam se nuk jemi
rastësisht aq lart në klasifikim dhe se nuk i druhemi asnjë skuadre.
Duam të qëndrojmë aty deri në fund të sezonit, e ta kurorëzojmë punën
e bërë, me një vend në Champions League” – ka qenë deklarata e
portierit shqiptar për mediat italiane, të cilat shkruajnë se Strakosha po
shihet edhe si pasardhës i Buffon tek Juventus, por por ndiqet edhe si
pasues i Donnarumma-s tek Milan, nëse ky i fundit largohet. Me këtë
gjendje shpirtërore shumë herë më të mirë se një vit më parë, Tomas ka
vendosur ta kalojë Vitin e Ri me familjen e tij./tesheshi.com/