Deputeti i Shkodrës, Tom Doshi, ka reaguar ditën e sotme dhe ka bërë me dije për mediat se në lidhje me çështjen e tij, ditën e mërkurë, në Komisionin e Mandateve, do të tregojë një fakt rrëqethës,se si është fshehur e vërteta dhe se si janë manipuluar dëshmitarët kyç në çështjen e tij.
“Të mërkurën shpresoj të jem mirë me shëndet, dhe në Komisionin e Mandateve do bëj publike dhe një fakt tjetër rrëqethës, pas të cilit nuk do mbetet asnjë shqiptar i paqartë për hetimet që janë bërë, si është fshehur e vërteta , dhe si janë manipuluar dëshmitarët kyç në këtë histori”,- thotë deputeti Tom Doshi në komunikimin e tij me mediat, ndërsa fton për durim deri të mërkurën pasdite.
Sipas tij, të gjithë shqiptarët po e kuptojnë çdo ditë e më shumë arsyen pse Prokurori i Përgjithshëm po përdoret nga Ilir Meta për të shkelur ligjin, dhe për të bërë skandale, që sipas Doshit, nuk do ti bënte askush, as një jurist i thjeshtë, jo më Prokurori i Republikës.
“Po ju jap të shihni një shkresë që më ka dërguar Prokuroria e Krimeve të Rënda në datën 20 Mars, ditën kur, pa bërë asnjë minutë hetim, i kërkuan Kuvendit arrestimin tim”,- thotë Doshi dhe bën publike për mediat dy shkresa, të cilat i gjeni më poshtë.
Sipas tij, janë dy arsye kryesore pse Prokuroria e Krimeve të Rënda kërkon ta arrestojë, pa bërë asnjë hetim mbi çështjen, të cilat, sipas Doshit, Vijojnë si më poshtë:
- Të shpëtonte Ilir Metën nga dalja e filmimeve të aeroportit të Hanoverit ku Spartak Braho takoi vëllain e Fatjon Skënderaj, fakt ky që do nxirrte zbuluar manipulimin që i bënë ata këtij dëshmitari
- Dhe gjithashtu të shpëtonte veten ky Prokurori i Përgjithshëm nga dëshmia, që do ishte një provë ligjore, për të provuar se ai ka pasur dijeni dhe se nuk bëri asgjë për 6 muaj rresht, duke mbrojtur krimin. Pas kësaj dëshmie Prokurori i Përgjithshëm duhet të jepte dorëheqje për shpërdorim detyre dhe mosveprim për hetim të krimit.
Sipas deputetit të Shkodrës, kërkesa për arrestimin me akuzën e kallëzimit të rremë, është veçse një sajesë e ulët, për të shpëtuar veten e tyre, me interes të ngushtë personal.
“Brenda një dite, me nxitim anti-ligjor, pa filluar asnjë hetim ndaj meje në Prokurorinë e Përgjithshme që ka kompetencë të hetojë deputetët, i kërkuan Parlamentit të arrestojë dy deputetë, me një akuze të falsifikuar”,- thotë deputeti Tom Doshi në deklaratën e tij drejtuar mediave.
Ndër të tjera ai shton se me këto akuza nuk është hetuar në gjendje arresti asnjë shqiptar në Republikën e Shqipërisë./tesheshi.com/
