Pasi SPAK ka çuar pas hekurave dhëndërin e Berishës, Jamambër Malltezi,, lidhur me aferën “Partizani”, goditja ka kaluar na kahjen tjetër, te pushteti. Prokuroria e Posaçme i ka sekuestruar 5512 m2 truall Artan Gaçit, ish-deputet i PS-së, bashkëshortit të ish-ministres Olta Xhaçka.
Sekuestro preventive është vendosur pasi po hetohet për falsifikim të aktit të marrjes së tokës në pronësi.
Kjo sipërfaqe rezulton të jetë një pjesë e tokës me të cilën Gaçi ka fituar statusin e investitorit strategjik pak kohë më parë.
Disa ditë më parë Gaçi u paraqit në SPAK, ku një ditë para tij ishte pyetur ish-kryebashkiaku i Himarës, Jorgo Goro. Kjo, pas një padie nga Fredi Beleri. Për të njëjtën çështje janë kallëzuar edhe Goro e vetë Xhaçka.
Pas këtij zhvillimi, bashkëshortja e tij Olta Xhaçka thotë se bashkëshorti i saj nuk ka marrë asnjë m2 tokë nga shteti, ndërsa inkurajon SPAK të bëjë punën e vet hetimin e “origjinës së një prone private qysh nga viti 1994”. Kjo, si përgjigje ndaj një akuze nga Berisha.
“Një kusar me damkë dhe shpifës me nam si Sali Berisha nuk mund t’i bëjë askujt moral.
Bashkëshorti im nuk ka marrë asnjë metër katror tokë nga shteti për investimin e tij privat dhe vënia nën sekuestro preventive prej disa javësh e një pjese të kantierit të investimit, për të hetuar origjinën e një prone private qysh nga viti 1994 është pjesë e një procesi që unë as e dyshoj në qëllim, as e komentoj në meritë.
SPAK-u të bëjë punën e vet i papenguar nga askush, ndërsa Sali Berisha le të vazhdojë të lehë për të tërhequr vëmendjen nga pantallonat e rëna deri në fund!”, shprehet Xhaçka. /tesheshi.com/
