Një reagim në FB i kreut të Bashkisë së Durrësit, Vangjush Dako, në adresë të kreut demokrat Basha, ka shpërfaqur një tjetër anë të njeriut që në pamje të parë të jep përshtypjen e një burri serioz. Shtatshkurtër por me tipare të rregullta, frizurë pa rini e me një pamje zyrtare, Gjushi siç thirret ndryshe, në vështrim të parë nuk të lë të mendosh se ke të bësh me ndonjë birbo. Madje dhe llagapi “Gjushi” sikur nuk i shkon në këtë aspekt, që ngjan me tepër si prej prototipa lagjesh. Opozita e ka shënjestruar atë prej kohësh, duke e futur në “listën e zezë” të saj me emra pushtetarësh që i lidh me krimin. Dako ka reaguar por jo si sot dhe jo me një soj gjuhe që vërtet e fut te prototipat e lagjeve.
Kreut të opozitës ai i ngjesh epitetin “toç”, si kryefjalë të një goditjeje verbale, që ngjan si e gatuar në një lokal të rëndomtë gjithashtu lagjeje, sesa nga Bashkia e një prej qyteteve më të mëdha e më historike të Shqipërisë e shqiptarisë bashkë.
“O Lulëzim Basha! Ti duhet t’i harrosh Durrësin, Shijakun dhe Krujën.. Sepse dikur edhe votonin për Saliun e për PD, po për toçin e Saliut votojnë vetëm nostalgjikët e PD dhe aq! Ti duhet ta kuptosh që s’ke vota o Lulëzim dhe s’ta kam fajin as unë, as durrsakët, as shijaksit as krutanët. NUK KE VOTE! Je një peshk rezervati që nuk hahesh dot dhe hidhu përpjetë sa të dush me kaseta me telefonata e me sajesa vemjesh.. TY NUK TE BESON ASKUSH o toçi i Saliut që i hap telefonin vetëm kunatit. Kurse mua më besojnë se ju hap telefonin të gjithëve dhe s’i kam duart as me gjak, as me zhul eurosh si puna jote! Ti vazhdo dil e shpif përditë jo krimi, jo droga, jo leku jo byreku, se ka ardh koha t’i marr edhe ca lekë unë nga thesi që të mban kunati ty. Do shihemi në gjyq bashkë ose në fakt jo, se ti merr raport mjekësor kur të thërret gjykata. Toç!”,
Basha është ai që është, me plot kusure në ligjërimin e tij, ku veçon edhe lehtësia dramatike për ta shpallur fët e fët tjetrin-politik si kriminel. Por kjo, për një kundërshtar me mend, do ishte avantazh nëse qëllon të jetë dhe i fisëm. Ndërsa Dako në këtë pikë është treguar katastrofa vetë. Ne nuk e dimë ende nëse ai vërtet e ka kriminalizuar veten deri në vjedhje zgjedhjesh, siç opozita e akuzon, apo nëse pas atyre përgjimeve ku komunikon me elementë problematikë nga Shijaku, fshihet vërtet një djall pushteti, por dhe vetë gjuha në përgjime, shkujdesja e atyshme dhe një lloj barazie në nivel artikulimi, mes tij si kryebashkiak dhe personit matanë me status laci, të lënë shijen e hidhur e zhgënjyese të një njeriu pa respektin e duhur ndaj vetes. Një lëndë të tillë ai e ofroi dhe gjatë performancës në Opinion, për t’i vënë vulën me një toçllëk fund e krye, në reagimin ndaj kreut të opozitës.
Nëse Shqipëria e nesërme, do jetë vërtet një vend me të tjetër elitë qeverisëse nga kjo e sotmja, me etikën si shenjë dalluese në ligjërim, e gjithashtu me një opinion publik të ndjeshëm më së pari ndaj paudhësive me fjalën, ajo çfarë Dako ka shkruar sot do përbënte një “faqe t’zezë”. /tesheshi.com/
