Bjellorusia, një aleat i ngushtë rus, mund të sulmojë së shpejti Ukrainën dhe po përgatitet të lejojë potencialisht Rusinë të vendosë armë bërthamore në tokën bjelloruse, sipas një zyrtari të lartë të inteligjencës së NATO-s.
Zyrtari, i cili dëshironte të mbetej anonim, tha se aleanca ishte e shqetësuar se trupat bjelloruse mund t’i bashkoheshin luftës në Ukrainë.
Ky zyrtar i NATO-s tha: “Qeveria bjelloruse po përgatit mjedisin për të justifikuar ofensivën bjelloruse në Ukrainë dhe vendosjen e afërt të armëve bërthamore ruse në Bjellorusi”.
Zyrtarët ukrainas kanë paralajmëruar publikisht se Bjellorusia mund t’i bashkohet luftës. Ndërsa Bjellorusia ka lejuar trupat ruse të përdorin territorin e saj për të nisur operacione tokësore dhe ajrore, NATO nuk ka parë ndonjë provë të fortë se trupat bjelloruse ishin të përfshira drejtpërdrejt në luftën në Ukrainë, tha zyrtari, sipas The Guardian.
“Nuk po ju them se do të vendosin armë bërthamore atje nesër. Ajo që unë mendoj është se ata kanë ndërmarrë hapa politikë në mënyrë që tani të mund të pranojnë armë bërthamore nëse merret një vendim i tillë”.
Zyrtari e përshkroi më tej konfliktin në Ukrainë si në prag të hyrjes në një ngërç, me forcat ukrainase që penguan Rusinë të avanconte, por presidenti rus Vladimir Putin nuk tregoi gatishmëri për t’u tërhequr.
Zyrtari vuri në dukje:
“Nëse nuk jemi në një ngërç, ne po i afrohemi me shpejtësi njërës. Realiteti është se asnjëra palë nuk ka epërsi ndaj tjetrës. Edhe pse nuk ka bërë përparim të rëndësishëm në dy javët e fundit, duket se Putini nuk dëshiron të pranojë dështimin”, tha zyrtari.
Problemi me ngërçin është se do të çojë në një “luftë të gjatë dhe afatgjatë” që do të përfshijë humbje “serioze” të jetës dhe dëme, nënvizoi zyrtari. /tesheshi.com/
